RTPA / Villaviciosa sigue siendo’l conceyu que más medra. Asturies sigue ganando población. Dempués de tocar suelu en 2022 con cuasi 1.005.000 habitantes, Asturies esperimenta la mayor medría del llustru al pasar del millón 9.000 habitantes hasta más de 1.015.000.
28 conceyos ganaron habitantes nel últimu añu. Los cuatro mayores d’Asturies figuren ente los que medren. Sobre manera, Uviéu que medra en más 3.500. Xixón, supera los 271.000 habitantes. Avilés roza los 76.000 y Siero los 53.000 dempués de sumar cuasi 500 nuevos vecinos.
Ún de los cambeos de tendencia d’esti censu de población conocíu güei céntrase nes cuenques mineres del Nalón y Caudal. Siguen ganando población. Llangréu y Mieres siguen penriba de los 38.00 y 36.000 habitantes. Otres poblaciones como Llaviana, Ayer y L.lena tamién algamen sumar nuevos vecinos, anque sea levemente.
Na costa asturiana, la evolución dispárase. Mientres los conceyos del oriente sumen vecinos, los d’occidente non. Villaviciosa sigue siendo’l conceyu que más medra. Gana 76 habitantes y roza los 15.400 habitantes. Tamién Colunga y Ribeseya medren levemente. A la escontra, nengún conceyu costeru occidental algama ganar población.
