Los vecinos instalen sensores nos depósitos d’agua, nes güertes y nes cortes, una estación meteorolóxica o cámares para xixilar les quemes forestales na redolada. LNE ¿Quién-yos diba a dicir a Nolo y Demetria, cuando reparaben l’atapecer mirando a Peña Mea dende Canzana, que diben vivir otra revolución industrial?
Pos sí, los protagonistes de la inmortal “L’Aldea perdida” d’Armando Palacio Valdés, son agora parte del saltu escontra’l futuru que vive Canzana, unu de los escenarios llavianeses de la novela.
Tan ye asina que Nolo y Demetria tán ende, n’unu de los 8 murales de distintos artistes que decoren Canzana, por suxerencia de la intelixencia artificial IA. Bastian Priendes, unu de los muralistas participantes nel proyectu “Intelixencia rural” presentó un bocetu de mural nel que taba esa puesta de sol. La IA suxurió a l’asociación de vecinos, impulsora de la iniciativa, qu’incluyeren a los dos personaxes. Asina se fixo, Bastian pintolos sentaos nun bancu énte l’impresionante paisaxe.
«Intelixencia rural»
Nolo y Demetria son solo parte d’un proyectu que va muncho más allá y que convierte a Canzana n’una aldega menos perdida y más conectada al mundu que nunca.
“Intelixencia rural”, financiáu pola Fundación Caxa Rural y cola collaboración del Conceyu de Llaviana, utiliza la IA para esos murales que camudaron la imaxe del pueblo pero tamién para munches más coses que más allá de lo estético van ameyorar la vida de los habitantes de la localidá.
Sensores y cámares
Canzana va pasar a ser un pueblu dafechu monitorizáu. El proyectu inclúi la instalación d’una rede wifi, “que va dexar dar mayor usu al Centru Social, yá que equí nun tenemos internet”, y dos redes Lora, protocolos de comunicación inalámbrica de baxu consumu y llargu algame diseñaos para l’Internet de les Coses”.
L’asociación de vecinos va instalar sensores nos depósitos d’agua y les fontes del pueblu. “Paez mentira pero nes zones rurales d’Asturies hai vegaes que tenemos problemes de suministru d’agua”, señaló Hevia. D’esta miente van conocer en tiempu real la cantidá d’agua qu’esquita de les fontes y los llitros que tienen acumulaos nos depósitos. “Eso va dexanos saber si podemos gastar más o menos enagua”. Nun se queda ende, esos datos van cruciase colos d’una estación meteorolóxica y tamién coles previsiones del tiempu, “asina que podemos saber cómo van tar los depósitos dientro d’unos díes”. Esi sistema puede unviar alertes a los vecinos o al Conceyu de Llaviana.
La idea ye asitiar tamién cámares en dalgún d’esos depósitos. Eses cámares van tener una función clave, la seguridá. Non solo por si hai dalgún actu vandálicu o intrusu sinón daqué que puede esmolecer más a los vecinos, les quemes. Les cámares van poder rexistrar si hai dalguna quema forestal próximu al pueblu, daqué qu’asocede con cierta periodicidá, y sollertar a los vecinos y a los servicios d’emerxencia.
Control de les güertes y el ganáu
Los sensores van instalase por tol pueblu, tamién nes güertes, “para conocer el grau de mugor o’l PH de la tierra y saber si ye necesariu regar o qué ye meyor llantar”. Tamién se van asitiar nes cortes y los espacios destinaos al ganáu. En total van ser más de mediu centenar de sensores que van unviar datos a una nube”. El tratamientu d’esos datos con un software específicu y l’intelixencia artificial va ufiertar a los vecinos información detallada de la situación en que s’atopen los sos depósitos o les sos güertes.
Hai detalles qu’anque paezan menores son bien útiles pa una localidá pequena como Canzana. Nel Centru Social van instalase peslleres intelixentes que van facilitar l’usu del equipamientu. “Puede paecer poca cosa pero si los llunes y los xueves a los once de la mañana hai clase d’inglés que da un vecín de manera gratuita, podemos programar la pesllera por que la puerta abrise a esa hora y nun tengan que tar pindies de si puede venir o non daquién de l’asociación cola llave”.
