«Sí a la música y non a la guerra» La reivindicación de la música en directo, el llamamientu a la solidaridá dientro’l sector y el feminismu marcaron la gala de los premios AMAS 2026. Musicasturiana.com
El vienres 13 de marzu’l Teatru Filarmónica d’Uviéu acoyó la gala d’entrega de los Premios AMAS 2026. A lo llargo de cuasi dos hores y media fixéronse la entrega de los gallardones nes 22 categoríes esistentes, pa les qu’había más de 30 nominaciones de músicos y productores venceyaos a la escena de la música n’asturianu.
El rechazu a la guerra; la reivindicación de la música en directo y de valtar cola Llei que prohíbe los conciertos en chigres; la sororidá ente muyeres; la emoción y agradecimientos a familiares y amistaes; y les llamaes al apoyu mutuu dientro’l sector marcaron el ritmu d’una gala na qu’había muncho que decir.
La música n’asturianu tuvo premiada yá dende la primera entrega. El qu’esto escribe foi convidáu pola organización de los Premios AMAS pa conceder la distinción a meyor DJ / Producción Electrónica. Dientro de los cuatro nominaos alcontrábense Jotadejota -DJ de Mostru l’Horru y Arma X, ente otros proyectos- y David Manso, productor que’l pasáu añu llanzó un remix del ‘Santa Bárbara Bendita’ de Nuberu. Foi’l qu’algamó’l premiu. Llueu tocaba’l turnu de les Lletres y foi la rapera Guaja D –que tien rapeao n’asturianu– la que llevó esta distinción na que tamién taben nominaos Gonzalo Pumares de Cerezal y Vérsica y Pirri d’Escuela de Odio.
La entrega de premios foi sucediéndose, reconociendo a les distintes escenes, a la variedá d’estilos y a la bayurosa producción qu’hai actualmente dientro de la música fecha n’Asturies. Y al ratín aportó ún de los momentos más esperaos, la entrega del AMAS d’Honor a Pauline en la Playa, o lo que ye lo mesmo, a les hermanes Alicia y Mar Álvarez. La primera d’elles fizo una intervención esquisita, enllena d’emoción y tamién de reivindicación nun teatru nel que taben presentes responsables políticos como Vanessa Gutiérrez, conseyera de Cultura, Política Llingüística y Deporte; Antón García, director d’Acción Cultural y Normalización Llingüística; David Álvarez, conceyal de Cultura d’Uviéu; o Álvaro Queipo, presidente del PP d’Asturies.
«Somos independientes, pero la independencia nun ye sinónimu de precariedá, igual que la vocación nun ye sinónimu de por amor al arte. Tenemos n’Asturies una riqueza enorme, cientos de proyectos artísticos y lo que necesitamos ye poder tocar música en directo yá»
«Somos independientes, pero la independencia nun ye sinónimu de precariedá, igual que la vocación nun ye sinónimu de por amor al arte. Tenemos n’Asturies una riqueza enorme, cientos de proyectos artísticos y lo que necesitamos ye poder tocar música en directo yá. Esto ye importantísimo porque somos un sector y necesitamos más fuercia y más sofitu pa poder desendolcar esta actividá con total dignidá», foi una de les coses que reivindicó Alicia Álvarez, quien compartió’l premiu «con toles muyeres músiques n’Asturies que tienen qu’aguantar el paternalismu, la condescendencia y esi sobrexuiciu qu’hai sobre l’actividá de les muyeres cuando nos movemos nun ámbitu mui masculinizáu como esti».
«Cuando nun hai igualdá y nun tenemos les mesmes oportunidaes nin los mesmos derechos de manera efectiva ye importante tener referentes, tener la esperiencia y la inspiración d’otres muyeres que t’ayuden a ver que si elles pueden, nosotres tamién; asina que tamos mui contentes de compartir el Premiu d’Honor con Mariluz Cristóbal Caunedo, que ye un arguyu y una inspiración», continuó Álvarez nun discursu nel que tamién tuvo pallabres d’agradecimientos, como munchos y munches de les premiaes, a la so familia y, especialmente a unos padres que supieron «valorar el tener un grupu de música como dalgo estraordinario, y non como dalgo que ‘bueno, yá se te pasará, será una época de tu vida’». «Cuando xubíemos al escenariu decíennos munches coses y una d’elles yera lo de ‘no lo hacen mal para ser chicas’. Mar y yo nun sé si lo ficimos bien o mal, pero sí se que lo queríemos facer y lo ficimos«, fueron les pallabres coles qu’estes hermanes remataron una intervención rellumante na qu’agradecieron el reconocimientu a 27 años de carrera.
«Cuando xubíemos al escenariu decíennos munches coses y una d’elles yera lo de ‘no lo hacen mal para ser chicas‘. Mar y yo nun sé si lo ficimos bien o mal, pero sí se que lo queríemos facer y lo ficimos»
Otra muyer que tamién lo fizo ye Vero Rubio. Desque s’atrevió a dar el pasu d’ocupar l’espaciu públicu cola so carrera en solitario, esta multiinstrumentista algamó dellos reconocimientos y el pasáu vienres llevó’l premiu d’Otros Instrumentos como trompetista. «Tamos equí, tamos en paz, tamos bien y ía muito yá nesta vida», dixo l’artista canguesa emocionada y agradecida pa con tola xente que l’arrodia. Agradecida tamién ta muncha xente con Sergio «Firu», responsable de grabar y arriquecer los trabayos discográficos d’una montonera d’artistes de la música’l país y que foi distinguíu col premiu a la Producción.
«Gracies a tola xente que dedicó unos minutos a alcordase de la música tradicional asturiana. Y anque esti premiu esti añu diéronmelo a mí, bien podría traer ‘premiu AMAS la voz ensin nome’«, con estes pallabres arrancaba la so intervención esa muyer de puru remangu que ye Leticia Baselgas, tres d’algamar el premiu a la meyor Voz. «Pa mí ye mui importante alcordame d’eses muyeres qu’a lo llargo de tola historia fueron capaces a tresmitinos coses, cantares, conocimientos… muyeres que fueron compositores, artistes, intérpretes, cantantes y músiques y qu’ensin embargo tola vida les infantilizaron llamándoles informantes como si fueran contenedores vacíos de pura tresmisión. Esti AMAS ye pa elles, pa les músiques de la tradición asturiana que tienen nome y apellíos«, concluyó la cantante y panderetera.
«Esti AMAS ye pa eses muyeres qu’a lo llargo de tola historia fueron capaces a tresmitinos coses, cantares, conocimientos… que fueron compositores, artistes, intérpretes, cantantes y músiques y que tola vida les infantilizaron llamándoles informantes. Muyeres con nomes y apellíos»
Una d’eses muyeres con voces y apellíos ye Mariluz Cristóbal Caunedo, la segunda persona distinguida col AMAS honoríficu. Un emocionante testu escritu y grabáu pola mentada Leticia Baselgas foi acompañando a les imáxenes que recordaben toda una vida dedicada a la canción asturiana. Tres d’ello, «La Caunedo» salió a recibir el gallardón cola so humildá, carisma y arrogancia -nel sentíu asturianu de la palabra-: «Gracies. Vais faceme llorar. Nun me parecía que yera esa yo de la que tantas cousas buenas decían d’el.la. Siéntome feliz, agradecía, con muncha sorpresa; nun lo esperaba, como decimos toos. Home, dalgo a lo meyor sí que puedo esperar de la mio xente asturiana, pero esto yá ye muncho«. Destacó con humor y ciñu al entamu del so discursu la tercer muyer gallardonada orixinaria del suroccidente asturianu nestos premios AMAS 2026.
«Gracies a tolos que-y gusten la tonada. Esa canción que llevamos tan dientro, nos nuestros raigaños. Yo apoyo siempre esa forma de cantar. Pienso qu‘eses canciones tán enrraigonaes en nós, tamién la xente mozo supieron adaptales a la forma de cantar de güei día y tenemos que cuidar a l’asturianada como se cuida un nenín na cuna, porque cuéntanos tolo que ye Asturies. Pienso que nun hai nada meyor qu’apoyar les raíces; aquello que nos fala d’ónde somos, d’ónde salimos». Tamién rescampló la sororidá na intervención de Mariluz Cristóbal Caunedo, que tuvo unes pallabres pa Pauline en la Playa y Leticia Baselgas; asina como la solidaridá con otros pueblos del mundu: «Dicen que la música qu’amansa a les fieres, pues hai que decir siempre sí a la música y non a la guerra«, fueron les últimes pallabres coles que la gran dama de la canción asturiana fizo que restallaren los aplausos per tol Teatru Filarmónica.
«Tenemos que cuidar a la tonada como se cuida un nenín na cuna, porque cuéntanos tolo que ye Asturies y dicen que la música qu’amansa a les fieres, pues hai que decir siempre sí a la música y non a la guerra»
Lisardo Lombardía, ex director del prestixosu Festival Interceltique Lorient y una de les figures más importantes de la industria musical asturiana foi’l responsable de dar el premiu na estaya de Gaita. Taben nominaes les bandes de gaites Saxum (Xixón), El Penedón (Castropol), Conceyu Grau y Villa de Mieres; siendo esta última la gallardonada y agradeciendo’l premiu a tola xente que lleva 30 años puxando por esta agrupación de música tradicional.
Unos minutos más tarde llegaba ún de los momentos pa colos qu’había más espectatives dientro de la escena de la música n’asturianu; ver quién llevaba’l premiu a meyor Canción Folk. Taben nominaos trés «folkis/tradis de manual»: Abéu con ‘L.lixeros’, Alienda con ‘El rescamplíu’ y Entós con ‘Barru’, pero’l premiu llevólu Marisa Valle Roso con ‘Cenicientes del carbón’, un temazu que bien podría enmarcase dientro de la categoría d’Otras Escenas, porque, afortunadamente, non tolo que ta n’asturianu o que fale d’Asturies, ye folk.
«Quiero dedica-ylo a toles muyeres que m’inspiraron, porque ‘Cenicientes del Carbón’ ta inspirada nes muyeres de la Güelgona del 62, en toes eses muyeres de les cuenques mineres y por eso va pa toles muyeres asturianes a les que tanto-yos debemos y nun podemos olvidar; porque qué sería d’Asturies ensin la llucha obrera, pero sobre manera, ensin la llucha de les muyeres«, sorrayó Valle Roso con tola so fuercia a la hora de recoyer el premiu d’un cantar que tamién bien podría ser merecedor del premiu al meyor videoclip.
«Qué sería d’Asturies ensin la llucha obrera, pero sobre manera, ensin la llucha de les muyeres»
L’espíritu de la Cuenca’l Nalón siguió presente nel escenariu cuando Chus Pedro xubió a entregar el premiu a meyor Discu Folk. Taben nominaos Rubén Bada col so trabayu homónimu, Guieldu con Memories de Deva, Héctor Braga con Rabil y Banda Gaites Llacín con Resollu. El premiu foi pa l’agrupación llanisca que salió a recoyelo con dellos de los sos componentes y de los músicos que participaron na grabación, como Lisardo Prieto de Felpeyu. Víctor Carbajal, director de Llacín xunto a Nuria Tarodo, foi quien pronunció un discursu nel que pidió «una vez más qu’hai que tirar y puxar pola música en directo«. Tamién tuvo pallabres d’agradecimientu a les más de 80 persones que fixeron posible un discu con «trés años de trabayu» al costazu y a les families que sofiten el proyectu.
La de Llacín foi la última distinción pa un artista venceyáu a la música n’asturianu, sicasí la gala siguió reconociendo a esa gran escena que ye la de tola música fecha n’Asturies y qu’acabó faciendo un homenaxe a dos nomes destacadísimos d’ella que nos dexaron el pasáu añu: Alberto Toyos y Jorge Martínez «Jorjón». Pero enantes hubo un momentu mui especial que sintetiza tolo que se vivió nesti actu d’entrega d’unos premios tan necesarios como son los AMAS; fueron les pallabres qu’unvió Dani G. del grupu November pa recoyer el premiu al meyor Discu Rock, nel que tamién taben nominaos Skama la Rede y Lïbre.
«Pa facer carretera tenemos qu’apoyanos ente nós. Naide sal alantre solo. Tamos nun momentu mui guapo onde Asturies esporta ayalgues diverses como Warcry, Rodrigo Cuevas o Nacho Vegas. Nun dexéis que decaiga, seguíi a los vuestros vecinos en Spotify, mirái los sos videos en YouTube y siempre que podáis dir a los sos conciertos o mercar la so música. Güei puede ser Teksuo, Arma X o Marisa Valle Roso y mañana puedes ser tú»
«Pa facer carretera tenemos qu’apoyanos ente nós. Naide sal alantre solo. Tuvi en países como Suecia, Finlandia, Estaos Xuníos o Xapón, onde los artistes pueden vivir del so arte independientemente de que faigas rock, folk o rap. Eso algamáronlo a base del apoyu y la unión ente los propios artistes y trabayadores del gremiu. Si vosotros que tais en primer llinia de batalla, nun consumís discos, entraes y merchandising, ¿quién lo va facer por vosotros cola mesma intensidá y pasión? Tamos nun momentu mui guapo onde Asturies esporta ayalgues diverses como Warcry, Rodrigo Cuevas o Nacho Vegas. Nun dexéis que decaiga, seguíi a los vuestros vecinos en Spotify, mirái los sos videos en YouTube y siempre que podáis dir a los sos conciertos o mercar la so música. Güei puede ser Teksuo, Arma X o Marisa Valle Roso y mañana puedes ser tú«. Amén, Dani G., vémonos na llinia del frente y que se note que tamos presentes.
