Apiast presenta n’Uviéu’l programa cultural de FLIPA 2026, la gran folixa de la ilustración asturiana. Instagram / Videu / LNE
L’Asociación de Profesionales de la Ilustración d’Asturies (Apiast) presentó esta mañana, na see del Muséu Arqueolóxicu d’Asturies, n’Uviéu, el programa cultural de FLIPA 2026, la primera Folixa de la Ilustración Asturiana, qu’inclúi charres y talleres, xornaes sobro bienestar profesional, una esposición itinerante, alcuentros profesionales y xuna gran folixa que va cerrar les actividaes, que se van desenvolver a lo llargo de too anguaño.
L’actu de presentación tien llugar Güei, 30 de xineru de 2026, Día Mundial de la Ilustración, a les 10:00h nel salón d’actos del Muséu Arqueolóxicu d’Asturies (C/ San Vicente 3. Uviéu). Ilustración: @cepandiellart
#flipa2026 #ilustracion #ilustracionasturiana #apiast
@apiast.ilustracion
@flipa_apiast
“Nun momentu nel que la intelixencia artificial xenerativa ta atacando y precarizando entá ye más a los oficios creativos y a la cultura, ye necesariu poner en valor los procesos artísticos y dar visibilidá a los profesionales que crean la cultura”, sostienen dende Apiast, que la so directiva ta presidida por Eva Rami y de la que formen parte, amás, Isabel Muñoz (vicepresidenta), Enrique Fernández, Guillermo Redondo, Rubén Megido y Julia Castañu.
Apiast, constituyida en 2024, cuenta con 80 asociaos y funciona col trabayu voluntariu de los sos integrantes, coles mires de velar polos sos derechos, visibilizar el sector, asesorar a los sos socios en temes fiscales y llaborales y crear una rede de profesionales. Ta integrada en FADIP, la Federación d’Asociaciones d’Ilustración Profesional n’España, y EIF, el Foru Européu d’Ilustración.
Los profesionales del sector quieren concenciar a lo llargo de too anguaño a la ciudadanía del valor de la creación personal frente a la espansión de la intelixencia artificial.
El director xeneral d’Acción Cultural, Antón García, qu’asistió a la presentación de la programación, destacó la importancia del “asociacionismo profesional” nel ámbitu cultural y de l’alministración. “FLIPA ye daqué bien importante que dexa visibilizar el trabayu de los ilustradores, homes y muyeres, d’Asturies”, manifestó, y brindó tol sofitu de la Conseyería de Cultura a la iniciativa.
