Esti mes de setiembre cumple un añu APIAST, l’asociación de profesionales de la ilustración d’Asturies y tengo l’enorme honor de ser parte d’esti xaréu. Nun añu en funcionamientu dió tiempu a esponer nel Muséu Barjola, la Factoría Cultural, La escuela d’Arte d’Uviéu, a dar talleres informativos, charres y meses redondes, entrar a formar parte de FADIP y a semar el xerme de lo que ta por venir nel 2026. Tengo unos compañeros de viaxe que son inspiración pura y una directiva que nun nos merecemos de la cantidá de tiempu que lu echen a esti proyectu tan guapu. Yá que sigamos de la mano munchos años.
¨Una imaxe val más que mil pallabres¨ La ilustración ye una disciplina artística por sigo mesma que consiste na representación gráfica d’un mensaxe, seya escritu o metafóricu. La so función ye la de xenerar creaciones visuales para comunicar, espresar, interpretar o complementar un testu, conceutu o procesu.
L’Asociación de Profesionales de la Ilustración d’Asturies (APIAST) ye una asociación ensin ánimu d’arriquecimientu qu’empecipia la so actividá en 2024 col envís de defender los intereses de la profesión a comuña y que funciona col trabayu voluntariu de les persones socies, pola defensa, la visibilización y la dignificación del seutor.
APIAST axunta a ilustradores de toa Asturies y ta formada por profesionales de la ilustración n’activu, en situación d’inactividá, en procesu de formación y tamién por persones que d’otramiente sienten interés por esta disciplina artística.
El primer llunes de cada mes aconceyamos online nuna xunta ordinaria, na que nos ponemos al día del rumbu de l’asociación, ufiertamos idees nueves y diseñamos les mecániques de trabayu de los nuestros proyeutos vixentes.
Nun somos una axencia d’ilustración; nunca nun vamos facer procesos de seleición pa terceros. Sicasí, tenemos un direutoriu de persones socies pa que dende les almininistraciones, entidaes o particulares puedan ponese en contautu direutu con elles.
Les propuestes de trabayu y collaboración que pudieren llegar direutamente a l’asociación van comunicase a toles persones socies al travies de la canal ordinaria pa fomentar la participación y la igualdá d’oportunidaes ente asociaes.
Oxetivos: Los fines de l’Asociación son, con calter xenéricu, la coordinación, representación, xestión, fomentu y defensa de los intereses xeneral y común de les sos persones socies, y en particular:
-
Promover, esparder y dinamizar l’actividá profesional de los sos asociaos y asociaes con especial procuru na ilustración fecha na nuestra Comunidá Autónoma.
-
Potenciar la presencia creativa asturiana, nel ámbitu de la ilustración, nel panorama nacional y internacional.
-
Adicar y analizar el mundu de la ilustración asturiana como preséu pa la meyora de la calidá de la representación asturiana nel mundu de la ilustración.
-
Investigar, recuperar, afitar y dar a conocer el patrimoniu históricu de la ilustración asturiana.
-
Investigar, esperimentar y desenvolver la ilustración tanto al traviés de les nueves teunoloxíes como de los sistemes tradicionales.
-
Defender, fomentar y afalar les llibertaes públiques y los derechos humanos al traviés del arte en xeneral.
-
Sirvir d’elementu catalizador ente les diverses especialidaes que constituyen l’oficiu.
-
Fomentar la formación continua de los y les ilustradores.
-
Entamar y crear servicios comunes de naturaleza asistencial, y tamién informativos en beneficiu de les sos persones socies.
-
Entamar y asistir a Congresos y Esposiciones rexonales, nacionales y internacionales y a toles actividaes que seyan d’interés específicu pa esta Asociación.
-
La supresión, por tolos medios llegales al algame, de les práutiques del intrusismu profesional en cualesquier de les sos formes.
-
Mirar pol prestixu profesional, la non competencia illícita y deslleal.
-
Averar a la sociedá l’oficiu de la ilustración cola realización d’actividaes.
-
Desenvolver y fomentar aiciones de collaboración col mundu empresarial cola organización de cursos, charres, seminarios, llabores d’asesoramientu y consultoría a empreses, comercios y profesionales.
-
Collaborar con Instituciones de calter cultural y social.
-
Dar a conocer la escena creativa de la ilustración d’anguaño de la nuestra redolada y recuperar trabayos y profesionales del pasáu, visibilizando la historia de la ilustración asturiana.
-
Esparder la importancia de la ilustración y el dibuxu pa comunicar conceutos, contar histories o aplicar y desarrollar distintos productos.
-
Amosar el trabayu d’artistes tanto noveles como consagraos, y sobremanera locales, y tamién averar a la ciudadanía al traviés de distintos soportes y formatos les téuniques del dibuxu, la ilustración y les artes plástiques en xeneral.
Junta direct
