- Alborecemos col cielu dalgo empuercáu de nubes altes ya con unes temperatures que tan alrodiu de los 4ºC, rexistrándose nel puirtu Payares 1,3ºC.
- Güei vamos tener delles nubes altes pela mañana que tenderán a desaparecer pela tarde con unes temperatures fríes a primeres y últimes hores pero mui afayaices al mediudía con un ascensu llixeru de les mismes, amás l’aire sedrá sele ya variable.
- Mañana martes alboreceremos col cielu poco nuboso o escampláu y xelando nes zones d’iversión. Durante la tarde dirá aumentando la nubosidá baxa pel norte que pue dexar dalgo d’orpín al finar el día. L’aire seguirá siendo sele con predominiu de la componente norte pela tarde y les temperatures camudarán poco o descenderán llixeramente.
- L’últimu día del añu alboreceremos col cielu nuboso y temperatures nun tan baxes anque en zones de montaña tará xelando y sedrán más fríes. Pali que pali la nubosidá va dir dixebrándose pa dexanos el cielu poco nuboso al escurecer cuando entamará a xelar y cuando van dase les temperatures mínimes del día. L’ambiente sedrá fríu y en los puertos de montaña va tar xelando durante tol día.
- El xueves, primer día del añu viniente, alboreceremos con fríu y xelando nes zones favoretibles pa dir templando’l día según avance la mañana.
- El vienres y sábadu la prosimidá d’una borrasca atlántica dirá aumentando la nubosidá amás d’empobinanos vientu ábrigu que fadrá que suban les temperatures.
- Y a partir del domingu según interautúe la borrasca atlántica col aire fríu que desciende per Europa podríamos tener un fuerte temporal de fríu y nieve con nevaes mui abondoses en cotes baxes pero entovía nun hai unanimidá ente modelos peronde va tirar la borrasca y si va aguantar el bloquéu anticiclónicu que tamos teniendo estos díes y ye’l que fae que descienda’l vórtice polar sobre Europa. Diremos viendo.
