Alicia Villanueva, Andrés Rodrigues y Rodrigo Roces ponen música al videu del proyectu, nel que tamién apaecen otres cares de la escena. Musicasturiana.com
El pasáu vienres el comité internacional d’espertos de la Capital Europea de la Cultura 2031 anunció qu’Uviéu ye una de les cuatro ciudaes finalistes pa poder algamar esta distinción internacional. L’anunciu llegó llueu de que’l miércoles 11 l’equipu que forma parte d’esta candidatura presentara en Madrid la so propuesta: Amabilidá. Con esti conceptu la candidatura quier facer «una aportación dende Asturies a un contestu internacional que necesita más diálogu, más escucha y más cultura» y, dientro d’esti actu, presentóse un videu nel que la música asturiana xuega un papel fundamental.
La cantadora d’asturianada Alicia Villanueva -ganadora del II Premiu Obdulia Álvarez «La Busdonga» na categoría de voz femenina- ye la responsable de poner voz a esti videu con una tonada compuesta por ella mesma pa la 1er Muestra d’Asturianada Electrónica del festival Artístiques. Xunto a ella ponen son Andrés Rodriguez (gaiteru deCaldo y Os Rabizos, ente otros proyectos) a la producción musical y Rodrigo Roces (teclista deLa Bedur) al pianu. Nel videu, dirixíu por Mónica Cofiño (La Xata La Rifa), apaecen tamién otres cares bien conocíes de la música’l país: el compositor Aarón Zapico (Forma Antiqva), la gaitera Guίa Jiang (Banda Gaites Llacín), el musicólogu y gaiteru Llorián García, la cantadora Mariluz Crisbóbal Caunedo y el baillador Pau Santirso, ente varies pandereteres, componentes de Xeitu y otres personalidaes de la cultura fecha n’Asturies. Amás, la pieza tradicional ‘De lavar del río’ suena al final d’esta obra audiovisual.
«La pieza, abrió la intervención del equipu marcando’l tonu de la esposición y situando al xuráu nel contestu cultural, social y territorial que sustenta la candidatura. A traviés d’imáxenes del patrimoniu, naturaleza, creación contemporánea y vida cultural, la pieza propón una mirada sobre Asturies», espunxeron dende l’equipu de la Capital Europea de la Cultura 2031 qu’encabeza’l xestor cultural Rodolfo Sánchez, plantegando que’l videu ye tamién «una forma de dar la bienllegada a quien quiera descubrir qué propón Uviéu pa Europa en 2031«.
Amabilidá, identidá y diversidá
«Suañamos con una Asturies onde la cultura acompaña, conecta y da xacíu; qu’inspire formes nueves de mirar al presente y d’imaxinar el futuru. Un territoriu que cuida los sos raigaños y s’abre a lo nuevo, qu’asume la diversidá como una riqueza compartida y entiende la cultura como un espaciu vivu, permeable y en constante evolución». Son otres de declaraciones de principios que fai esta candidatura que, col videu presentáu, fai un reconocimientu a la música’l país y a la llingua asturiana nesti proyectu que ta respaldáu pola Conseyería de Cultura, Política Llingüística y Deporte y pol Ayuntamientu d’Uviéu y que cuntó colos sos responsables, Vanessa Gutiérrez y Alfredo Canteli, na presentación del mesmu.
«Uviéu apela a l’amabilidá frente a una sociedá marcada pola agresividá y la violencia. Esta ye una resistencia necesaria y urxente que nos recueda qu’esiste otra manera d’habitar el mundu, más poderosa que l’odiu y la ira. La cultura ye’l meyor vehículu pa xenerar narratives d’esta amabilidá tresformadora, capaces de tresmitir esperanza, respetu y confianza nel otru y d’imaxinar una convivencia pacífica que concilie diferencies y fomente la coexistencia y la coevolución«. Con estes pallabres l’equipu d’Uviéu 2031 defende’l conceptu que los llevó a quedar finalistes xunto a Cáceres, Granada y Las Palmas de Gran Canaria. Agora tienen nueve meses pa perfeccionar la so propuesta enantes de que’l xuráu internacional vuelva a aconceyar pa tomar la decisión definitiva, prevista pa finales de 2026.
