Vérsica asoleya ‘Baxo l’agua’, l’adelantu del so segundu trabayu. El cantar ta basáu nun poema de Marcos Álvarez y continúa la llinia de la so anterior entrega, con un mestura de pop, rock, folk y lliteratura. Musicasturiana.com
Vuelven Vérsica. Tres d’estrenase l’añu pasáu col so primer llanzamientu homónimu, esti grupu encabezáu polos componentes de Cerezal Gonzalo Pumares y Marcos Álvarez, llanza agora ‘Baxo l’agua‘, single y lyric videu del que va ser el so segundu trabayu discográficu. Nesti cantar basáu nun poema del mesmu nome escrito por Marcos Álvarez continúen la llinia del so trabayu anterior, nel que la lliteratura comparte protagonismu con una música influenciada pol pop, el folk y el rock.
Nesta ocasión la grabación ficiéronla ente payares y avientu de 2025 Gonzalo Pumares al violín; Marcos Álvarez a la voz, guitarres, moog y programaciones; Ana Belén Rodríguez a la voz; Juan Yagüe a les guitarres; y Wilón de Calle a la batería. Próximamente Vérsica va dar más novedaes rellacionaes cola que va ser la so segunda referencia discográfica.
Vérsica debutaron a finales de 2024 con un primer discu basáu nun cuentu infantil escrito por Pumares que trescurre al traviés de diez cortes musicales y nel que caún d’esos diez cortes ye un poema que, de dalguna mena, esplica una parte de la historia del protagonista del cuentu: un vieyu que yera mozu. Nél recuéyense poemes d’autores actuales consolidaos, de la nomada Segunda Xeneración, o de los años venti del sieglu pasáu. Nomes como Miguel Monteavaro, Xurde Fernández, Vanessa Gutiérrez, Xabiero Cayarga, Taresa Lorences, Nené Losada o Fernán Coronas tán presentes na esbilla de los testos nel que se tuvieron mui en cuenta los sentimientos del protagonista: la soledá, l’abandonu, el mieu o la perda, pero tamién l’amor a la tierra, la conexón cola naturaleza y la felicidá. D’esta manera esta iniciativa axuntó lliteratura; música folk, rock y pop y diseñu artísticu; unes característiques que van caltener na so próxima entrega.
