Edificios emblemáticos y monumentos d’Uviéu, Xixón, Siero, Llangréu, Mieres, Castrillón y Samartín del Rei Aurelio van sumase a otros de toa España que van apagar esti sábadu les sos lluces una hora -al igual qu’otros países- pa marcar la Hora del Planeta, el mayor movimientu global en defensa de la natura, que cumple güei 20 años.
N’Uviéu, la catedral, el palaciu de la Xunta Xeneral, la ilesia de San Xuan El Real, el Teatru Campoamor y el monumentu al Sagráu Corazón van apagar la so llume, como lo fadrán la Ilesia de San Pedro, l’antiguu Institutu Xovellanos o l’antigua Pescadería Municipal, en Xixón.
Acordies cola organización ecoloxista Fondu Mundial pa la Naturaleza (WWF), impulsora va dos décades de la iniciativa, «millones de persones en más de 190 países y territorios de toles llatitúes» van xunise al actu, celebráu añalmente l’últimu sábadu del mes de marzu, ente les 20:30 y les 21:30 hores.
Dientro del territoriu español, según detalla la web de WWF, xúnense al movimientu verde edificios reconocibles de tolos puntos del país.
Dientro de la Comunidá de Madrid, van apagar les sos lluces el Palaciu Real y el Panteón d’España, la sede del Senáu, el Real Xardín Botánicu, l’Institutu Cervantes, les fontes de Cibeles y de Neptuno y la Puerta d’Alcalá, ente otros.
Tamién se van quedar a escures nesi tramu la ponte de Triana y la Torre del Oru, en Sevilla, o la Sagrada Familia y el Castell de Montjuic, en Barcelona.
