ASTURIANU Y ESCUELA: UNA LLINGUA
QUE DEPRENDER, UNA LLINGUA PA FALAR
El martes 10 de febreru, a les 19H.00’, nel llocal social del Atenéu Obreru de Xixón (Cai Francisco Tomás y Valiente, 1 – 2ª Planta), Ástura organiza la conferencia Asturiano y escuela: una llingua que deprender, una llingua pa falar, a cargu de Xosé Antón G. Riaño. Ateneo Obrero de Gijón
Esta actividá mensual en torno a la promoción de la cultura asturiana ye una collaboración ente les entidaes Atenéu Obreru de Xixón y ÁSTURA.
La conferencia ufierta un análisis críticu y de llargu percorríu sobre la escolarización del asturianu, dende una perspeutiva histórica, educativa y sociollingüística. Repásense cuasi cuarenta años de presencia de la llingua nel sistema educativu, non como simple cronoloxía, sinón como un procesu complexu qu’esplica’l modelu actual y les sos llendes. Falarase tamién del marcu llegal y alministrativu del enseñu del asturianu, poniendo atención nes consecuencies de la falta d’oficialidá sobre’l planeamientu educativu, la estabilidá del profesoráu y la coherencia del sistema. Apurriránse datos actuales d’escolarización de la llingua. Un apartáu destacáu centraráse nes investigaciones sobre los efeutos de la enseñanza del asturianu, qu’analicen el rendimientu escolar, les actitúes llingüístiques y la valoración de la so importancia, aportando evidencia empírica y desmontando tópicos. Finalmente, mirarase al futuru pa plantegar les necesidaes y espeutatives sociales alredor de la presencia escolar del asturianu, señalando les condiciones imprescindibles pa una escolarización digna, eficaz y socialmente útil.
Xosé Antón G. Riaño ye una figura de referencia indiscutible nel ámbitu del estudiu, la defensa y la dignificación de la llingua asturiana. Doctor en Pedagoxía y Caderalgu de Didáutica de la Llingua y la Lliteratura na Universidá d’Uviéu, representa como pocos la conxunción ente conocencia científica, compromisu cívicu y responsabilidá institucional. Dende’l so orixe somedanu –magar que nacíu en Viella (Siero)– y fondamente venceyáu al país y a la realidá sociollingüística asturiana, foi ún de los mayestros qu’entamaron a dar clas d’asturianu en 1984. La so especialidá como investigador ye’l billingüismu escolar, la enseñanza de les llingües minoritaries, los aspeutos sociollingüísticos rellacionaos coles enseñances llingüístiques y la educación intercultural. Agora mesmo’l so interés como investigador tien que ver col estudiu de los neofalantes d’asturianu, la llealtá llingüística y el papel de la escuela. Ye Vice-presidente de la “Sociedad Internacional de Didáctica de la Lengua y la Literatura”, pero, sobre tou, ye presidente –por tercer períodu– de l’Academia de la Llingua Asturiana dende 2017, cargu que-y permite conocer dende dientro les dificultaes, les contradicciones y tamién les posibilidaes reales del procesu de normalización del asturianu. Tamos, polo tanto, ante un intelectual que lleva décades reflexonando, escribiendo y actuando sobre los mesmos problemes que güei se ponen enriba la mesa, ensin baxar la guardia. La so intervención ye síntesis d’un itinerariu vital y profesional comprometíu col futuru de la llingua y del país.
