Publicado en Llibros Adultos

Trés llibros recuperen la hestoria de ‘les muyeres del carbón’

Les muyeres tamién baxaron a la mina: trés llibros recuperen la hestoria de ‘les muyeres del carbón’

‘Carboneres’, ‘Fíos del Carbón‘ o ¿ú el nuesu pan? son llibros qu’enceten cómo les muyeres formaron parte de la hestoria de la estracción del minera.


Elles ocupábense de remanar el dineru qu’entraba en casa pa llegar a final de mes, curiaron de los fíos y fíes, formaron piquetes mientres les fuelgues, crearon redes de sofitu y enllordiáronse les manos del carbón que tamién alendaron. Los verbos conxúguense en pasáu porque la industria de la minería n’España ta a puntu de sumir, pero les muyeres tuvieron y entá tienen un papel na hestoria de la estracción d’ese mineral anque pasara más desapercibíu qu’el de los homes. Aitana Castaño y Alfonso Zapico fueron dos de los autores qu’empobinaron el focu d’atención a ese colectivu nel so llibru Carboneres, qu’acaba de publicar l’editorial Pez de plata.

Nun fueron los únicos. Casi al empar llanzáronse dellos trabayos que, cada unu a la so manera, tamién toquen la tema, como Fíos del Carbón (Alfaguara, 2020) de Noemí Sabugal o ¿ú el nuesu pan? (Marcianu Sonoru) d’Abel Aparicio. Toos los autores conocen bien el terrén nel que se desenvuelven les sos hestories, nun son meros visitantes.

Castaño y Zapico nacieron na cuenca minera asturiana (en Sama de Llangréu ella, en Blimea él) a principiu de los 80. Son Los neños de fumu, una figura que da títulu al primer tomu d’estes memories sentimentales de la minería que publicaron va dos años na mesma editorial. La so biografía ta irremediablemente amestada al carbón. Naquel relatu quedárense-yos fora o nun planu secundariu delles figures vitales pa la vida nes cuenques mineres y teníen esi escayu claváu.

«Unu d’ellos yera’l de les muyeres», esplica Castaño a elDiario.es. «La carbonera ye la figura lliteraria, ye la parte pol tou. Pero eses carboneres son un homenaxe en realidá a toles muyeres de les cuenques. Tán venceyaes a la mina dende un puntu de vista profesional pero tamién representen a les nueses güeles, a les nueses madres, a les novies, amigues, hermanes y tíes, que vivieron equí».

La vida nes zones mineres foi bien dura a lo llargo de toa la so hestoria y sigui siendo porque la muerte entama sobre cada xornada llaboral. Ameyoró colos años, anque a base de una llucha llaboral ferrial y de soportar una represión bien violenta. Sobrevivir a tou eso nun sería posible ensin eses otres figures qu’apaecen nel llibru, como la del tenderu y la del cura obreru. Tamién hai una alcordanza a los emigrantes españoles «que se fueron por motivos políticos pero tamién por trabayu. Anque equí había de sobra, como dicía’l mio güelu Antonio, pa tar na mina teníes que ser probe como un aguarón, porque si non, nun entrabes ende», desenvuelve Castaño.

Les esperiencies de los personaxes enxareyase pa esplicar qué pasó nos pueblos mineros asturianos na década de los 60 del sieglu pasáu. Montecorvo del Camín nun esistía hasta qu’Alfonso Zapico inventó na ficción pa emplazar la Revolución d’Ochobre del 34 na so serie de llibros La balada del Norte y sirve tamién d’escenariu de Carboneres. «Hai munches hestories basaes na realidá. Por casu, fálase de les tortures que sufríen les preses nel franquismu, nos cuarteles d’equí. Había una represión bien fuerte, casi toa venceyada a la política y n’especial al Partíu Comunista. Eses muyeres tienen nome y apellíu, como la archiconocida Anita Sirgo, a la que toos nestes cuenques adoramos o deberíamos, porque ye la memoria viva de lo que pasó neses décades o Tina la de la Joécara», sostien Aitana Castaño.

En Carboneres esos castigos los infligía un xeneral de la Benemérita conocíu como Trujillo. «Ta basáu nuna persona que tamién esistió, yera Guardia Civil equí en Sama. Tien nel so haber daqué tan indignu como ponese’l bañador pa dar palices a los que tenía deteníos p’asina nun enllordiase’l traxe de sangre. Ya inda esiste xente que les recibió. Hai que cuntar eses coses, anque camudé los nomes porque a la fin nun dexa de ser una narrativa inventada», declara la escritora.

Dicha violencia conociose a nivel nacional dempués de la gran fuelga de 1962 y amenaron xestos de denuncia y solidaridá ente la comunidá intelectual del país. Carmen Matín Gaite, Nuria Espert o Dolores Medio asistieron a una manifestación na Plaza del Sol de Madrid en defensa de los represaliaos, por casu. Y Manuel Fraga, daquella Ministru de Cultura y Turismu del franquismu, recibió la famosa carta de los 102 intelectuales, pidiendo xuna investigación sobro los actos perpetaos por Fernando Caru Leiva, xeneral de la Guardia Civil, ente les que s’incluyíen el maltratu y rapáu de pelo o les pataes nel banduyu a una embarazada.

La escritora Noemí Sabugal, qu’acaba de publicar l’ensayu Fíos del Carbón (Alfaguara, 2020), tamién considera que ye importante visibilizar esi papel de les muyeres na hestoria de la minería. «Non tol mundu conoz el papel que tuvieron na fuelga del 62 cuando se manifestaben n’Asturies, que tiraben maíz a los pies de los esquiroles pa llama-yos pites. O eses muyeres que fueron tosquilaes y que’l pintor Eduardo Arollo dexó afiguraes nunos cuadros qu’a día de güei inda son bien atanantes. Ye necesariu recuperalo y recordalo sobremanera porque’l so papel llegó hasta’l final. Nel añu 2012, cuando se fixo la gran manifestación a Madrid creóse l’asociación de les Muyeres del Carbón, de toles cuenques mineres d’España y foi bien importante», comenta a elDiario.es.

Coles manos tisnaes (tiznadas).

La presencia femenina na minería non solo foi periférica, sinón que tamién formaron parte de la plantiya de les mines. Anque mientres muncho tiempu foi de manera asolapada, según l’actividá que desenvolvieren. Sabugal, natural de Llión y de familia minera, esplica que «mientres munches décades la llimpieza y l’escoyíu del carbón dependía de les muyeres. El trabayu por casu nes llínees de baldes tamién yera un trabayu bien feminizado, entre digamos mediaos del sieglu XX inclusive poconín escontra tras, inclusive años 30, años 20».

Esos yeren trabayos d’esterior pero hubo momentos nos qu’elles tamién entraron nel pozu. Cuando l’Estáu precisaba, básicamente. «Cuando la guerra entá taba acabando y nos años de la inmediata posguerra, como munchos mineros fueren represaliaos y taben na cárcel les muyeres entraron nel interior de les mines. Lo que pasa que’l franquismu siempres acutaba’l papel de la muyer al d’esposa y madre. Non solo nes cuenques mineres sinón a nivel nacional. Asina que quixo tapar esa circunstancia y llamabales ‘productores’, non mineres», esclaria la escritora. Tamién cunta que «nuna presentación averóse xuna señora de la zona d’El Bierzo y cuntóme que la so madre tuviera cinco años trabayando nel interior de la mina porque tenía cinco fíos y el padre taba presu. Entrara más o menos nel añu 38 o 39».

Abel Aparicio conoció a Libertad Aurora n’unu de los sos caminos en bicicleta pela zona del Tremor, n’El Bierzo. Esa muyer sosprendió-y al cunta-y mientres dos hores la hestoria de la so vida. «Díxome qu’elles taben fuera de la mina porque en teoría y solo en teoría, nun podíen entrar. Pel branu de siete y media de la mañana a diez de la nueche con media hora pa comer. Elles cobraben seis pesetes y media al día y los homes xustu’l doble, 13 pesetes. Cuando xuna minera casábase echábenla de la mina por llei porque’l so llabor yera la de tar en casa faciendo los llabores propios del so sexu’«, asegura a elDiario.es.

Esta hestoria, el paisaxe industrial mineru y l’orografía de la tierra fueron los trés factores qu’impulsaron la escritura del so llibru ¿ú el nuesu pan?, trés relatos sobro la vida na posguerra y les sos miseries. Nun principiu, Aurora –que foi bautizada como Llibertái Aurora, anque cola victoria de Franco perdió’l so primer nome– nun quería cuntar nada de protestes, pero finalmente abrióse. «Yeren cinco na llínea de baldes y siempres que llegaba’l xefe quitaba a una diciendo que sobraba. Hasta qu’un día llantáronse, cruciaren de brazos y dixeron qu’hasta que nun tuvieren cinco fixes nun trabayaben más. Y el encargáu punxo llocu, pero acabó aportando», rellata.

Consiguir un trabayu na mina na mesma categoría qu’un home llogróse poco primero de que empezara’l cayente de la industria. Como recuerda Noemí Sabugal, «el pasu de la muyer a la mina nun foi francu sinón que se fixo al traviés d’una sentencia xudicial del Tribunal Constitucional en 1995. Concepción Rodríguez denunció la evidente discriminación que significaba que nun coyeren a nenguna de les ocho muyeres que superaron les pruebes pal millar de puestos que sacara Hunosa nel añu 85. Ende la muyer volvió a la mina yá como minera, digamos».

«Si’l to padre matábase na mina, si yeres home entrabes a trabayar n’Hunosa automáticamente pero si yeres muyer, non», afirma Aitana Castaño, que tamién recuerda que «les muyeres teníen tamién enfermedaes derivaes de la mina. Poles carboneres pasaba tol carbón porque yeren les que taben nel rete escoyéndolo y sufríen bien de de silicosis, pero nun se-yos reconocía. A la vulnerabilidá del sector de la minería nos años 40, xuníase-y la de ser muyer. Amás, taba bien mal visto que trabayaren ellí. Les carboneres solíen ser viudes o nueves ensin casar».

¿Yera la minería un sector especialmente machista? Noemí Sabugal esplica que «esto yá nun ye que lo diga yo, dicienlo les muyeres que s’incorporaron nesos momentos. De primeres munchos mineros nun lu entendieron nin lo sofitaron. Pero’l machismu nesti sector ye como’l d’otros sectores. Nun quiero pensar cómo pudo ser el primer xuiciu con una muyer xueza, cuando un home tuvo qu’almitir qu’esa muyer que taba delantre d’él diba poner la pena».

Les mineres coles que faló Sabugal cunten que la primer reacción solía ser la ridiculización, pero agora «anque’l númberu de mineres siempres foi bien inferior al d’homes, en llugares como Asturies, onde siempres hubo más, yá naide sospriéndese demasiáu. Y eso yá ye un llogru, pero creo que foi tan difícil como en cualesquier otru oficiu». Según Castaño, «les burricaes que se-y pueden dicir a una muyer nel pozu de xuru son más que nel despachu d’abogaos. Pero elles tamién sabíen devolver, ellí nun se quedaba paráu naide. Hubo compañeros que-yos fixeron la vida imposible fixísimo, pero elles aguantaron el tipu y ende tán. Ellos duros, pero elles más».

¿Por qué agora?


Ilustraciones d´Aitana Castañao y Alfonso Zapico, autores de ‘Carboneres’

Los trés llibros tuvieron bona acoyida. Pero Aparicio, como esplica, nun esperaba nada d’esto: «Fiximos la primer edición y tamos a puntu de sacar la segunda. Nun sé por qué. Entiendo qu’en Llión o n’Asturies la cosa funcione, pero me tán pidiendo llibros nel País Vascu, en Madrid, n’Estremadura, en Valencia. Soi un autor al que nun conoz naide. Y por casu la editorial Elkar, que distribúi nel País Vascu, Navarra y el País Vascu francés, pidióme un montón de llibros».

Aitana Castaño, que tamién percibió’l notable interés que Carboneres amena fora de les zones mineres, considera que «les xeneraciones que criamos nos años 80 o los 90, cuando empezaba’l cayente de la minería, vemos capacitaes pa cuntalo agora, de meyor o peor manera, porque no fondero creemos que tenemos xuna especie de delda coles cuenques». Sabugal comenta que «nel llibru utilizo xuna frase de Novalis que diz que tola alcordanza ye’l presente. Si recordamos eses coses qu’asocedieron va ser el nuesu presente, vamos tener claro que nun lleguemos equí a consiguir ciertes coses por maxa nin de sópitu, sinón qu’hubo munches y munches engarradielles por consiguir derechos llaborales y derechos sociales».

Amás, hai que tener en cuenta que’l final de la minería tien xuna carga simbólica bien importante. Como esplica Castaño, «los mineros yá, de per se, tán bastante mitificados, son como los toreros pero en versión obrera. Hai xuna imaxe qu’a muncha xente nuevo llegó-y mui cerca del corazón, que foi la entrada de los mineros y mineres n’agostu del 2012 pela Gran Vía de Madrid na última marcha del carbón. A esa xeneración que taba dando puñaes sociales y políticos enriba de la mesa porque nun se sentíen identificaos, aquelles lluces fueron como’l mitu que precisaben. Nun dexa de ser el fin d’una dómina, la de la minería pero tamién de munches coses. Ye un fin un pocu amestáu a la cultura pop».

Autor:

Maestra de Llingua Asturiana Colexu Carmen Ruiz-Tilve - Uviéu