Publicado en TIEMPU

Tiempu: Agua n’Asturies

Calor afogadizu nel restu d’España

Cuasi un llitru y mediu d’agua per metru cuadráu recoyóse esta mañana en Colunga que se convirtió nel llugar onde más llovió de toa España. Eso equí. En Jaén, por exemplu, esta madrugada -con unes cais ermes- taben a 35 graos, una temperatura que güei va a superase en dellos puntos d’España.

N’Asturies alendamos un branu distintu que nos salva de la fola de calor estremu. Les temperatures son suaves y si destacamos por daqué ye pol agua.

Con un gran bastiazu espertaron en Colunga esta mañana. Chubasqueros y paragües sustituyíen al bañador y la sombriella, anque dellos valientes metiéronse n’agua. Y ye qu’esti tiempu nun disgusta a tol mundu.

Uviéu ye otru de los llugares onde más llovió. Güei’l tiempu meyoró con orbayu, pero les temperatures nun llegaron a los 20 graos. Munchu turista vino a la capital pa fuxir de la fola de calor qu’azota a cuasi tol país.

Pero los asturianos echamos de menos el branu. Con resignación, toles nueses esperances pal bon tiempu yá tán puestes en setiembre.

Calor afogadizu nel restu d’España

Más de 15 provincies sufren un calor estremu que pinta de colorao y naranxa’l mapa español. En Madrid, pasaron una nueche con temperatures superiores a los 30 graos.

La fola de calor va algamar el so puntu más críticu esti fin de selmana. Según l’Aemet, les previsiones pa esti sábadu van llegar a temperatures tan altes, que yá se considera como unu de los díes más calurosos de los últimos años.

El calor estremu del Norte d’África ta dexando unes altes temperatures na península y les zones de los dos archipiélagos. Yá son 15, les comunidaes que tán n’alerta, Andalucía, Aragón, Cataluña y la Comunidá Valenciana tán en riesgu estremu.

Los termómetros van llegar a los 46 graos en zones como’l campu cordobés, pero nun queden atrás Huelva, Sevilla o Jaén, onde van llegar a rondar tamién los 46 graos.

A lo llargo d’esti fin de selmana, tendrán qu’aumentar los procuros pa evitar golpes de calor, caltenese en llugares abellugaos del sol y como siempres, beber agua.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *