N’Asturies hai ente 15.000 y 20.000 horros, el más antiguu ye del sieglu XVI. El Principáu dio anuncia d’un plan d’horros pa caltenelos. Dende l’Asociación Amigos del Horru Asturianu piden abrir la mano porque, a vegaes, ye más barato dexar caer l’horru que reparalu.
«Los horros van poder tener usu turísticu como agospiamientu venceyáu a una vivienda»
- Fonte: El Comercio /
Pablo Llión Gasalla Director xeneral de Cultura y Patrimoniu del Principáu d’Asturies
El Principáu trabaya yá xuntu al ministeriu por que la típica construcción asturiana opte a ser Patrimoniu de la Humanidá
Sábadu, 31 avientu 2022, 01:01
Trés años cumple por estes feches Pablo Llión Gasalla (Xixón, 1976) como director xeneral de Cultura y Patrimoniu. Historiador y xeógrafu bregáu na Alministración pública, tien per delantre cinco meses para rematar el so proyectu para tresformar la cultura y el patrimoniu asturianos, que, anque retrasáu pola pandemia, él considera abondo bien empobináu.
-Tres estos trés años de trabayu y cola llexislatura na recta final, ¿de qué se siente arguyosu?
-Nel ámbitu del patrimoniu, de la medría presupuestaria, que lo doblemos. Y a final d’añu executaríamos un 90%, frente al 10% d’otros años. Tamién de crear nueves llínees de trabayu como’l Plan de Cultura Castreña, sistematizando les actuaciones nesti ámbitu, sumando nuevos castros. O’l futuru Plan Director del Horru, que va ser unu de los grandes afitaos de la llexislatura. En cultura dímos-y la vuelta a la forma de rellacionanos colos sectores y aumentando un 70% les subvenciones con al respective de 2019. Creemos llínees nueves y l’añu que vien vamos añedir la de festivales musicales, que nun teníen encaxe. Tamién ye un finxu la creación d’Asturies Cultura en Rede, que llega a 50 conceyos, un circuitu que vieno para quedase. Los fondos para la Rede de Teatros y l’Amuesa d’Artes Escéniques dexen #asimilar n’inversión a lo que tienen otres comunidaes del nuesu tamañu.
-¿Cuál ye l’estáu xeneral del patrimoniu asturianu?
-Lo más destacao, lo que ye Patrimoniu Mundial, el Prerrománicu, les cueves rupestres y el Camín de Santiago, creo que ta bien. L’estáu de caltenimientu ye bonu y hai dalgún ámbitu como’l del Prerrománicu nel que tamos avanzando enforma. Sí qu’hai problemes derivaos de la despoblación. Cuando un pueblu abandónase, el so patrimoniu tien problemes. Cola nueva realidá del mundu rural, por casu, yá nun se precisen 15.000 o 20.000 horros como tenada o almacén. Tamos a puntu de realizar una reforma de la Llei de Patrimoniu para faer posible nuevos usos alternativos que van apurrir una solución a bona parte d’estos horros y paneres.
-¿Como agospiamientos turísticos o viviendes?
-Ye lo que tamos estudiando. Venceyaos a un agospiamientu que yá esiste, pero qu’ufierten un númberu de places de forma escepcional, anque nun cumplan los requisitos d’accesibilidá. Por casu, pueden destinase a un turismu d’esperiencies. O venceyaos al Camín de Santiago, como abelugos, para vivaquear o pasar una nueche sí que se ve que pue ser una solución. Como vivienda ye que nun cumple tampoco los requisitos d’accesibilidá nin de seguridá en casu de quemes… puede ser una estancia venceyada a una vivienda, con un usu distintu al habitual. Pero hai que ver qué tresformamientos son necesaries. Si hai que poner una cama o moblame, tenemos qu’estudialo, faer cálculos de la so capacidá de carga para ver qué puede faese y qué non.
