Alborecemos col cielu empuercáu de nubes altes ya con unes temperatures que tan alrodiu de los 15ºC, rexistrándose nel puirtu Payares 13,7ºC.
Güei les temperatures van subir entovía más, algamándose los 30ºC en munches zones d’Asturies con una sensación de chornu importante pero pela tarde la llegada d’un frente atlánticu va dexanos precipitaciones d’oeste a este y un descensu moderáu de les temperatures, amás puen ser de calter tormentosu y venir acompangaes de raches de vientu moderaes en zones de costa.
Mañana xueves alboreceremos ente’l borrín y la nublina, tando más escampláu hacia la cordelera y fastera más surocidental. Durante’l día sedrá difícil qu’abra’l día nel llitoral y fastera central con nubosidá estratificada, surdiento nubosidá de desendolque pela cordelera. Les temperatures descenderán moderadamente y l’aire sedrá sele ya variable.
El vienres tendremos de nuevu’l cielu cubierto por estratos nel llitoral y fastera central, tando más escampláu na cordelera y surocidente con unes temperatures n’ascensu llixeru, l’aire seguirá siendo sele ya variable con brises pela costa.
El sábadu aumentará la inestabilidá ya tendremos xarabatos de calter tormentosu durante la tarde y paez que’l domingu, el borrín y la nublina adueñaranse de nuevu d’Asturies con unes temperatures en descensu.
Fan destacado-
-
Responder
- 24 min
