Publicado en Llibros Reciella, Pintar-Pintar, Premios

Opta al «Premiu 2021 a los Llibros Meyor Editaos en 2020».

Per primer vegada, una obra editada n’asturianu aspira al Premiu a los Llibros Meyor Editaos en 2020 qu’entama’l Ministeriu de Cultura y Deporte. FICHA: «Xosefa de Xovellanos. La Esbelta. La dama ilustrada de les Lletres Asturianes» de Vicente García Oliva e Ilemi Cuesta Mier

“El fechu de poder presentar un llibru n’asturianu yá ye un ésitu”, apunta Ester Sánchez

Ye la primer vegada que podemos faer esto, la primer vegada qu’un llibru editáu n’asturianu puede entrar nesta convocatoria. Y eso, yá ye tou un premiu.

“El fechu de poder presentar un llibru n’asturianu yá ye un ésitu, sobre manera a futures”, apunta la editora Ester Sánchez. “En convocatories pasaes, al nun ser oficial l’idioma, nun te teníen en cuenta, yera como si lo que s’editaba equí n’asturianu nun esistiera fuera, pero esti añu cambió la cosa depués de les conversaciones de Berta Piñán y Antón García col ministeriu”, añade.

Con trés Premios Nacional de Edición, nel 2007, 2012 y 2014, dende Pintar-Pintar llamenten los munchos trabayos “que nun pudimos presentar” estos años por ser n’asturianu. Agora aspirar per primer vegada con un llibru nesti idioma al honoríficu Premiu a los Llibros Meyor Editaos, correspondiente a los títulos espublizaos nel 2020, con ‘Xosefa de Xovellanos. La Esbelta. La dama ilustrada de les Lletres Asturianes’, tres tar na llista d’almitíos, “un pasín más pal asturianu que nos fai tar mui contentos”.

Escritu por García Oliva, con guapes ilustraciones d’Ilemi Cuesta, “ye un llibru fundamental que mira pa la cultura y pa les muyeres al traviés de la figura de Xosefa, desconocida pa munches persones”. Emplegáu por maestres y maestros pa trabayar en clase, ye’l primer llibru d’una coleición que busca dar a conocer biografíes de muyeres y tendrá continuidá cola d’Urraca l’Asturiana, colos mesmos autores y con salida prevista, si nun hai novedá, pal añu qu’entra.

Adxuntu Tamañu
PDF icon BOE Bases del Premiu 2021 a los Llibros Meyor Editaos 2020 269.78 KB
PDF icon Títulos almitíos al Premiu 2021 a los Llibros Meyor Editaos 2020 582.63 KB

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *