Publicado en Ciencia, Curiosidaes

Científicos de Google y l’universidá d´Harvard crean un mapa del celebru humanu

Con 225 millones d’imaxes…

Ún de los cortes del celebro usaos para´l mapa (Google/Lichtman Laboratory)

El mapa de namá un 1 milímetru cúbicu del celebru ocupa 700.000 millones de páxines. Científicos de Google y l’universidá d´Harvard crean un mapa 3D d’un milímetru cúbicu del celebru humanu usando 225 millones d’imaxes y 1,4 petabytes de datos.

Crearon el mapa del celebru humanu más detalláu de la hestoria, usando más de 225 millones d’imaxes y miles d’hores de supercomputación mientres más d’un añu de trabayu.

La resultancia nun ye namá una maravía de la neurociencia sinón qu’amás ye una nueva demostración de l´increíblemente complexu que ye’l celebru humanu: tou esi esfuerzu y l’increíble volume de datos resultante namá consiguieron codificar un milímetru cúbicu del celebru.

Para poner esti datu en contestu, ente que esti mapa d’un milímetru cúbicu utilizó 1,4 petabytes de datos — un volume d’información lo suficientemente grande como para almacenar casi cuatro años de vídeu n’altu resolvimientu o 700.000 millones de páxines de testu — el celebru humanu tien un volume medio de 1.260.000 milímetros cúbicos.

Imaxe 3D d’una pequena sección del milímetru cúbicu de celebru
(Google/Lichtman Laboratory)

Según el so estudiu, esti mapa recueye namá una millonésima parte de los envaloraos 86.000 millones de neurones y ente 100 y 500 billones de sinapsis qu’hai nel celebru. Pero, entá asina, nun dexa de ser impresionante.

Cómo lo fixeron: Según un artículu publicáu por Google, el so mapa empezó con una amuesa d’un milímetru cúbicu tomada del lóbulu temporal d’un celebru humanu. Dempués de tiñilo pa llograr más contraste, l´encapsularon en resina por que pudiera caltener la so forma.

Depués consiguieron cortar esti milímetru en 5.300 capes. En total, caúna d’estes capes tenía una grosez de namá 30 nanómetros. En comparanza, un pelo humanu mediu tien una grosez de 70.000 nanómetros. L’equipu pasó caúna d’estes nanolonchas por un microscopiu electrónicu con un resolvimientu de 4 nanómetros. D’ende salieron les 225 millones d’imaxes en dos dimensiones, que fueron asitiaes por un supercomputador n’una matriz tridimensional pa llograr el modelu final.

Pero’l procesu nun acaba ende: pa crear el mapa de conexones, los científicos tuvieron qu’utilizar algoritmos d´anteligencia artificial. Estos algoritmos tien dos funciones. Una ye desfacer d’inconsistencies y erros mientres el procesu d’escanio. La otra, identificar qué ye qué dientro de la tomografía.

Inda un gran misteriu:  El mapa — que sigue’l que yá fixeron de la mosca de la fruta — ye totalmente interactivo (riqui Google Chrome pa funcionar). Y toos los elementos d’esti mapa 3D tán perfectamente identificaos pola AI: Axones, mielina, cilia y dendritos, según venes y arteries, tán toos ende.

Esti esfuerzu para mapear les conexones de too el celebru humanu — llamáu connectome — inda ta na so infancia. Usando’l mesmu métodu, el volume d’almacenamientu necesariu para mapear un celebru completu sería de 1,4 zettabytes. La estimación actual ye que tolos datos d’internet ocupen unos 40 zettabytes. Esto ye, nun da nin para’l mapa de 30 celebros humanos. Según una cálculu de 2019, Google, Amazon, Microsoft y Facebook almacenen ente toos 1,200 petabytes. Esto ye: namá 0.0012 zettabytes. Ta claro que’l retu ye titánicu.

N’otres palabres, consiguir el santu grial del mapa completu del celebru humanu quédanos inda abondo llueñe. Pero tamos en camín y, con esa conocencia, quiciabes vamos poder entender la nuesa esistencia un pocu meyor.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *