Publicado en NATURA

Reparen per primer vegada n’España la rapaz más pequena d’Europa

 

“Foi un momentu inolvidable, una sensación increíble, un chute d’adrenalina. Pensé que taba suañando”.

Asina describió l’ornitólogu asturianu Daniel López Velasco (Salinas, 1987) la emoción que sintió al afayar nos Pirineos la presencia, per primer vegada n’España, del mochuelu alpín o mochuelu chicu (Galucidium passerinum), l’ave rapazu más pequena d’Europa.

Nun ye una anécdota: faía 34 años que nun s’identificó n’España un ave desconocida. Y el descubrimientu obliga a camudar el mapa de distribución de la especie.

“Nun teníamos nengún barruntu, nin información, nin rumor, nin nada. Tábamos ellí estudiando otres dos especies. Foi cientu per cientu casual. De sópitu escuché un soníu y supi que yera un miagón alpín”, remembra López Velasco, capaz de reconocer “d’oyíu” los soníos de toles aves d’Europa.

Asegura que nesti casu nun foi difícil, porque’l soníu del mochuelu alpín ye “distintu”. Amás, nun monte de los Pirineos, a 1.800 metros d’altitú, “anque increíble, podía pasar”. De fechu mientres munchos años especúlose, “suañarase cola so presencia nos Pirineos, porque comparte hábitat y distribución nel continente con otres especies eurosiberianas que sí tán presentes nel macizu que dixebra España de Francia. Pero nunca hasta agora habíase documentado la so presencia.

 

 

 

 

 

 

 

 

Recuerda perfectamente’l momentu: grabó’l soníu de l’ave col móvil, pero quería vela colos sos propios güeyos. Reprodució’l rexistru sonoru cola grabadora, hubo unos segundos de silenciu y, de sópitu, el mochuelu/miagón alpín, que tien el tamañu d’un gorrión, pasó volando xusto percima d’él, “siguíu d’un montón de paxarucos. Foi increíble, totalmente inesperáu. De xuru nunca más me pasará na vida”, rellata.

El naturalista nun acababa de creer lo que lu pasara. “Foi un momentu d’incredulidá. Esi día pensé delles vegaes que taba suañando. Hasta pellizquéme para comprobar que yera real”, comenta. Pocu dempués reparó otra pequena ave que podría ser tamién de la mesma especie, anque non pudo constatar fehacientemente.

L’asturianu aventura qu’el so descubrimientu puede ser solo “la punta del iceberg”. “Sería muncha casualidá qu’estos fueren los únicos exemplares presentes nel Pirinéu esta primavera. Tou indica qu’hai más. Que se ta asitiando o que se va a asitiar como especie nidificante n’España”, señala.

“Va Haber que tar sollertes nos próximos meses a ver si otros observadores confirmen la presencia de más exemplares. Pel momento, les autoridaes yá tán avisaes y va intentase realizar un control refechu de la zona. Lo que sí ye seguro ye que va haber que camudar el mapa de la especie”, añede.

López Velasco, que taba nos Pirineos en compañía de Roberto Menéndez, solo viera enantes un miagón alpín n’una ocasión, en Finlandia, nel añu 2007, pero “nun foi una observación ‘guapa’, porque apenes había lluz”, asina que la de los Pirineos foi “casi como la primer vegada”.

Medrana a una avalancha d’observadores

La so mayor medrana ye que’l descubrimientu provoque unu ábanu d’observadores nos Pirineos. Porque la zona del afayu ye bien sensible, con presencia tamién d’otres especies amenaciaes, como’l urogallo, y tarrez que la presencia humana, y la reproducción del so propiu rexistru sonoru para atraelo, provoque xustu lo contrario, qu’estorne a los exemplares presentes y que “ensin querer xenérese un problema grave”. Porque “agora lo que prima ye que la especie asentiase nos Pirineos», añede.

Dani López Velasco, médicu, empezó a reparar aves con solu cinco años d’edá. Bien llueu empezó a tomar notes de campu sobro les especies que vía dende la so casa. Con solu 10 años atopó, debaxo de la so casa, el tercer rexistru de Collalba desértica (Oenanthe deserti) n’España, y dende entós arreyóse na identificación avanzada d’aves rares. A los 12 años realizó’l so primer viaxe d’observación d’aves fora d’Europa, a Mariña Rica.

/Facebook

Dende fai 15 años ye miembru del Comité Español de Rareces, y topó primicias tantu n’España como n’otros países. Publicó documentos d’identificación en numberoses revistes ornitolóxiques y los sos viaxes pa identificar aves y como guía dexáron-y visitar más de 50 países.

A los 19 años formó parte del equipu que ganó’l premiu Oryx pa mozos naturalistes, lo que-y dexó esfrutar d’un llargu viaxe d’investigación polos llugares más recónditos de Marruecos. Na actualidá prepara xuna guía avanzada d’identificación fotográfica n’español y trabaya como guía profesional en visites d’observación d’aves per Europa, África, América, Asia y Oceanía na prestixosa axencia británica de viaxes ornitolóxicos ‘Birdquest’.

Asina ye’l miagón alpín

El Glaucidium passerinum ye l’ave de rampiña más pequena d’Europa, con un llargor de 16-17 centímetros, xuna valumbu de 29-38 cms y un pesu que difier ente los machos (50-72 gramos) y les femes (65-83 gramos). Ta incluyida nel anexu I de la Directiva sobro aves (especies suxetes a protección). La so área de distribución cubre casi toa Eurasia y el so hábitat ye’l monte de coníferes.

El cuerpu ye robustu y los adultos presenten un plumaxe cimeru marrón con llurdios claros ya inferior ablancazáu con rayes llonxitudinales escures. Nos mozos ye más escuru y ensin puntos de lluz cimeru.

El picu ye pequenu y agabitáu, de color claru y base gris. La cabeza ye pequena y arrondada y los güeyos tán asitiaos enantes, con un iris mariellu. Les nales son anches y curties, la cola ye curtia, barrada, que s’alza rítmicamente. Tien pates robustes, curties y emplumaes, con uñes agabitaes.

Reproduzse de mayu a xunetu y suel añerar nos buecos de los grandes árboles, principalmente los escavaos enantes por picatueros. Pon ente 3 y 9 güevos de color blancu, qu´eclosionan en 28-29 díes. La descendencia echa a volar a les 4-5 selmanes. La especie solo reproduzse una vegada al añu y la so esperanza de vida ye de 10 años en llibertá y 20 en cautividá.

Ye una ave activa principalmente pela nueche, pero tamién ye posible vela a l’amanecida y al anochecer, ya inclusive a otres hores del día parada na parte cimera de los árboles (especialmente exemplares de coníferes).

Ta afecha a la vida nel monte y ye capaz de prindar aves casi tan grandes como ella. Tamién s’alimenta de pequeños rucadores/roedores, reptiles ya insectos. Ye depredado por rapazos más grandes. El principal peligru pa esta ave ye’l tresformamientu, fragmentación y destrucción del hábitat d´anidación pol ser humanu.

Llugares onde puede reparase el mochuelu alpín n’Europa:

https://www.birdingplaces.eu/es/birds/4714

Dos vídeos del mochuelo alpinu grabaos por Dani López Velasco:

https://www.facebook.com/daniel.lopezvelasco.1/videos/3665857600305578

https://www.facebook.com/daniel.lopezvelasco.1/videos/3665857293638942

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *