Coyer, escoyer, faer gaviella, esbillar, apurrir, enriestrar… Fueron llabores acomuñaos a la recoyida del maíz, la cebera que tiempu tras sirvió para quitar la fame a decenes de families. En Porrúa (Llanes) son términos bien comunes qu’en poques cases escaecieron.
Videu. Y por que nun sían namá palabres acomuñaes a los llabores de padres y güelos, esta fin de selmana dende l’Asociación Cultural Llacín decidieron da-yos tol so sentíu y poneles en práctica. Porque nun hai meyor manera de reconocer la realidá que viviéndola.
Ye interesáu como’l tiempu apacigua los sentimientos
y lo qu’un día yera una xera trabayosa,
güei ye daqué que nun quieren escaecer.
Nun fai tantos años, los vecinos xuníense para ayudar a la familia que nesi momentu tuviera recoyendo la collecha. Primero diben a la tierra a cortar y coyer, dempués escoyíen d’aquellos panizos les panoyes, depués les muyeres quitáben-yos gran parte de les fueyes hasta dexar la cebera estena con namá trés o cuatro de les sos fueyes vueltes escontra tras. Terminada aquel llabor, metinlo en carpanchos, y los pequeños averaos a los grandes, siempres homes, por que, valiéndose d’un alambre central, dir ensobiándoles hasta dexar una columna bien cargada de maíz, la riestra.
Aquello ensugaría nel desván o nel horru, quien lo tuviera, y una vegada llistu, sirviría para faer farina de la que se fadríen tortos, borones y otros platos que xunto coles fabes y les pataques fueron el sustentu mientres tantos años…
Nun hubo nin un solu pasu qu’esta fin de selmana nun se diera en Porrúa. Con muyeres, neños y homes. Cada unu cumpliendo la so misión. Pero con tintes distintos a los d’antes. Porque agora nun ye un trabayu, ye una tradición que los porruanos empeñense en caltener. Y ye que nada meyor que recordar d’ónde venimos, pa saber quién somos. Y naide meyor qu’un porruano pa convertir una tradición en cultura.
