Publicado en Curtiu

Goyas 2022: ‘Nacer’, un curtiu nomáu a los Goya sobro lo que siente un neñu al tener un hermanin

El curtiumetraxe d’animación Nacer, nomáu a los Premios Goya 2022, cunta la hestoria de Carlos, un neñu de cuatro años que s’enfrenta al retu emocional de tener un hermanin.

Una hestoria que vos llegará al corazón y que ta dirixida por Roberto Abargane y producida pol so hermanu Carlos (La siella de la vida, Segundito), colos que falemos.

Y lo primero que preguntamos a Roberto ye d’ónde naz esti curtiu: «¿Qué se siente al ser un neñu y afayar que vas tener un hermanin/ina? Yo nunca lu supi porque soi esi hermanin, pero siempres quixi sabelo. Amás, encántenme los momentos en que somos inocentes, estraños a la conocencia, pos ye precisamente cuando más cerca nos atopamos d’él. Cuando’l cambéu ta próximu y cuando por fin yese consciente ye cuando’l ser humanu ye verdaderamente humanu».

«Estes dos premises -sigue Roberto- dan llugar a Nacer, que ye, lliteralmente, creación. Una hestoria que trata sobre lo qu’esiste nun estáu conteníu, ayenu a la lluz, y que dempués sale al mundu tal que rixe la naturaleza: el ñácaru nel planu visual y la conciencia del neñu protagonista nel planu non visual. Decidí enfrentame al desenvolvimientu de la obra vacíu de conocencia, narrativu y artísticu, pa convertime asina nesi neñu protagonista y poder ser realmente auténticu nel mio llabor: Creábame a mi mesmu pa poder crear la hestoria».

Una hestoria pequena que trata grandes temes

Nos sos nueve minutos de duración el curtiu fálanos de grandes temes, como nos comenta Roberto: «En Nacer trátense temes como l’amor frente al refugu o’l perdón frente al arguyu, emociones (delles) qu’apaecen per primer vegada na vida del neñu protagonista. Destaca tamién la unión familiar, el regalu que supon pertenecer a una familia y nunca sentise solo».

Pero’l curtiu tamién fala de la España despoblá: «En cuanto al contestu -asegura’l director-, escoyemos la vida nun apacible pueblu manchegu porque lo conocemos perbién, ye onde nacimos y crecimos, un llugar nel que’l tiempu trescurre sele, ensin priesa, ideal pa cultivar l’amor y tolos bonos valores. Falar de lo que se conoz ye la única forma d’apurrir tol valor posible».

Un neñu de 4 años que s’enfrenta al so primer desafíu

El protagonista del curtiu ye Carlos, un neñu de 4 años que s’enfrenta al primer desafíu de la so vida, la llegada d’un hermanu. «De xacíu, el neñu ta inspiráu nel mio hermanu Carlos -confiesa Roberto-. Entá ye pequenu, inocente y curiosu, polo qu’una noticia tan especial como la llegada d’un hermanu implica un xiru total na so vida. A pesar de tener bien bonos sentimientos non tou ye como él imaxinaba, y tendrá d’aprender a aceptar los cambeos y xestionar perbién les emociones».

Destacar tamién el sele ritmu narrativu del curtiu, que nos sospriende nesta dómina onde nos suelen bombardear con imaxes costantemente. «La mio intención -asegura Roberto-, siempres foi consiguir una narración pausada, sele y qu’alienda, porque solo asina puede apreciase la vida. Tantu’l tipu d’encuadres como’l ritmu de montaxe atienden al pulsu y emociones que sienten los personaxes, variando ente planos abiertos y zarraos o ente un tempo contemplativu y frenético. Asina, llograr una animación tan humana nun foi nada fácil porque nun se trataba solamente de ser realista, sinón d’afaer esi realismu al minimalismu del estilu, teníamos de contener l’animación ensin perder la so esencia».

D’ende que les figures de los personaxes tampoco tean delimitaes per llínea. «Nacer ye’l mundu d’un neñu, onde nun hai llendes (trazos) -asegura Roberto-, tou ta en contactu con tou y los colores son quien dan identidá y sentíu. Escoyer esti estilu tien el so orixe n’el mesmu conceutu que da vida a la hestoria: amosar solamente aquello que ye esencial y puru. Afaer la forma al fondu».

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *