Publicado en Indumentaria

Sestu Concursu INDUMENTARIA

Marta Vielsa y Luis Ángel Fernández Santos llevaron el primer premiu del sestu concursu ‘Indumentaria’

Na imaxe, Toledo, Buznego, Vielsa, Fernández Santos, Gutiérez Granda y Luengo. Semeya obra d’Ojos de Hojalata Fotógrafo.

Magar l’amenaza de mal tiempu, qu’obligó a llevar les actividaes al Frontón del Parque d’Arrriba, los paxellos tradicionales llucieron en Grau nel VI Día’l Traxe’l País. Foi otra gran xornada cargada de tradición na que Marta Vielsa y Luis Ángel Fernández Santos convencieron al xuráu de‘Indumentaria’ pa llevar el concursu. Calca nesta semeya pa ver la galería completa…

Semeyes del desfile del Concursu Indumentaria 2022 y, tamién, de la Muestra de pieces antigües de la colección de Consuelu Ríu. El día’l traxe’l país convierte a Grau na capital de los traxes porque na pasera pueden vese pieces úniques, como los tupíos que texía Felisa Quirós, la última texedora de Vayu. Gracies a toles persones que nos ayuden a deprender cómo yeren y vistíen los nuestros antepasaos.

Al final el día respetó y los más de 30 modelos pudieron desfilar colos sos traxes pela pasarela instalada nel llugar ensin les molesties que podría ocasionar l’agua y l’aire nun llugar abiertu. Abaxo munchu públicu, la mayor parte vistíos como vistíen les asturianes y asturianos nel sieglu XIX, convirtiendo la xornada nuna folixa alrededor del traxe’l país.

El xuráu d’esta edición decidióse polos conxuntos presentaos por Vielsa y Fernández Santos como los merecedores del primer premiu de cada categoría, muyer y home, con una recompensa de 200 euros pa caún. Antona Luengo y Henar Buznego, y Emilio Gutiérrez Granda y David Toledo, completaron la llista de gallardonaos, y llevaron 150 euros los segundos y 100, los terceros.

El VI Día’l Traxe’l País completóse con xuegos tradicionales pa la reciella de la mano de Prau Llerón, baxo’l nome de ‘Menudu traxín’, pela mañana y con baille, pela tarde. Hebo pandereta, gaita y tambor con Paz Mesa y Luis. A. Pola; Henar Buznego y Paula Vega; Nacho Díaz y Elena Díaz; Roge Feito y Clarita Braña; Ivan Fernández y Fonsu Fernández; y Ramsés Ilesies y Xosé Antón Fernández ‘Ambás’.

La galería oficial d’Indumentaria ye yá una tradición. La calidá del trabayu del nuestru fotógrafu de siempre, Ojos de Hojalata, ye escepcional, destacando en cada semeya hasta l’últimu detalle del nuestru traxe del país, con una nitidez única. Ye un lluxu facer esti trabayu na capiya Los Dolores. La nuestra particular Galería de retratos de cada persona concursante, xuraos, collaboradores y organizadores ye digna de cualquier muséu y convierte a esti eventu cultural nun referente indiscutible. Gracies a toos por ayudanos a facer Indumentaria 2022. Y, sobremanera, gracies al Ayuntamientu de Grau y a Caja Rural de Asturias.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *