Publicado en Museos

Muséu del calamar xigante, pal branu de 2022

El nuevu muséu de L.luarca va esibir seis calamares xigantes y va recrear el so hábitat

El percorríu pol equipamientu va ser circular, al traviés de nueve zones temátiques, y la previsión ye qu’abra al públicu para’l branu de 2022
Muséu del Calamar Xigante nes antigües instalaciones

El futuru Muséu del Calamar Xigante de L.luarca, que va abrir antes del próximu branu, va esibir seis exemplares de los calteníos pola Coordinadora pal Estudiu de les Especies Marines (Cepesma), va tener un recurríu circular, conteníu específico empobináu al públicu infantil y sistemes de realidá virtual. L’equipamientu va amosar en nueve zones temátiques les peculiaridaes d’estos animales marinos.

 

 

En tol percorríu va reinar un atmósfera misteriosa, asemeyada a la parte de fondura onde vive’l calamar xigante. Col fin de llograr, amás, un efectu de flotabilidá de parte del material, va haber poca lluz, la puramente necesaria pa una fayadiza llectura de los conteníos. L’oxetivu ye que’l visitante siéntase “como un esplorador del océanu”, razón pola que tamién van tener protagonismu los efectos sonoros especiales. Asina, podrá escuchase el fluyir de l’agua y tamién los soníos qu’emiten estos grandes animales marinos. Ente los elementos espuestos va destacar una maqueta central, a tamañu real, d’un calamar xigante que va tar suspendida nel aire. El percorríu va tener, otra manera, nueve partes estremaes. La entrada va dar la bienvenida con un croquis del muséu y va dedicar un espaciu al Cepesma y al so presidente, Luis Laria, “por ser l’artífiz de la colección espuesta y pol so llabor na divulgación y promoción del caltenimientu de los nuesos mares”, según consta nel proyectu. Otra zona va presentar al kraken “como ser mitolóxicu” y una tercera va amosar 35 cefalópodos de too el mundu. Otru departamentu va destinase a l’anatomía de los calamares xigantes y va dexar visible la maqueta del animal a escala real. Tamién nesti rincón de la sala va haber una mesa interactiva sobro anatomía.

Nel siguiente pasu, el visitante va #atopar col calamar más grande de la esposición, de cuatro metros, ya información sobro la so alimentación y crecedera. N’otra zona estremada va proxectase’l documental “Proyectu Kraken: en busca del calamar xigante”, grabáu na fuesa de Carrandi. Ende tamién se van amosar dolce pexes abisales y va haber dos meses interactives de xuegos pa menores. Unu tituláu “Somórguiate hasta’l fondu”. L’otru, “Criatures monstruoses”. Más palantre, el muséu va ufiertar información sobro la reproducción del calamar xigante y el so depredador, el cachalote. Una última zona va dedicase a sensibilizar al públicu sobre la protección de los océanos.

Tocantes a la realidá virtual, el proyectu museísticu como tal nun preve esti material, magar el conceyal de Cultura, Ismael González, concreta que más palantre el Conceyu va adquirir gafes o cascos virtuales que van recrear la estancia nes fondures marines.

L’apertura d’esti muséu ye bien esperada al ser esta colección de grandes cefalópodos única nel mundu y por acabar nun almacén.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *