Alborecemos col cielu empuercáu de nubes altes y el fumu de los nunmerosos incendios. La nueche ta siendo mui prieta en munchos conceyos de toa Asturies. L’aire de componente sur que sopla con fuercia nes nueses montañes fae que baxe la humedá abondo, subán les temperatures resecando’l terrén y propagando con facilidá cualesquier llume que se faiga y esto lo lleva faciendo durante munchos díes.
En cuanto a les temperatures superamos los 15ºC na mayor parte d’Asturies, con record estos díes de temperatures, tantu másimes como mínimes más altes de la serie, en delles estaciones meteorolóxiques asturianes, pa un mes de xineru.
Güei domingu y mañana llunes vamos seguir igual, sicasí puen descender dalgo les temperatures y amenorgar el vientu ábrigu. Nel cielu tendremos nubes medies y altes entemecides ente dellos claros, anque estos sedrán minoría.
Nun sedrá hasta’l martes cuando camudará la situación cola entrada d’una pequeña vaguada que mos dexará precipitaciones y un descensu de les temperatures, la nieve surdirá perriba de los 1300m y l’aire gallegu pue soplar con fuercia nes zones altes ya en puntos del llitoral.
Durante los siguientes díes vamos tener tiempu variable, la sucesión de delles vaguaes per Asturies va dexanos díes con precipitaciones y refrescamientu con díes de nubes ya claros y ascensu de les temperatures, de momentu nun se ve la posibilidá d’una iverniza curiosa, seguiremos sollertes ya informando.
Bones noticies mos tan traslladando agora mesmo los nuesos collacios del surocidente, mos comenten qu’amenorgo abondu l’aire que tan surdiendo nubes baxes de sur nes cumes de les montañes, la humedá ta subiendo, les temperatures en descensu ya inclusu que per Degaña cayeron cuatro gotes esti riscar. A ver si se van traslladando estes bones noticies al restu d’Asturies.
Semeyes d’esta nueche dende’l Padrún, desgraciadamente reflexo de lo que ta pasando nel restu d’Asturies.
