Publicado en TIEMPU

Estáu del tiempu n’Asturies

Bonos díes, bona xente.
Alborecemos col cielu nuboso y delles nublines no fonderu los valles, tando más escampláu na cordelera con unes temperatures que tan alrodiu de los 8ºC, rexistrándose nel puirtu Payares 1,3ºC.
Güei va caltenese’l cielu nuboso con escases posibilidaes de precipitación, sicasí nel estremu más oriental puen ser más probables, tando más escampláu na fastera surocidental onde predominarán los grandes claros, estendiéndose al finar el día al restu d’Asturies. Les temperatures van camudar poco y l’aire sedrá del nordés dalgo molestu en puntos del llitoral y zones altes.
Mañana xueves alboreceremos con escasa nubosidá y delles xelaes no fonderu los valles. Durante’l día la llume del sol dirá caleciendo l’ambiente, anque la mañana sedrá fría y solo a primera hora de la tarde l’ambiente sedrá afayizu al abellugu del nordés que pue soplar dalgo molestu en zones altes ya en puntos del llitoral.
El vienres les xelaes van ser más xeneralizaes con cielu escampláu ya iversiones térmiques, tando más fríu no fonderu los valles que nos puirtos de montaña. El nordés perderá puxu y l’ambiente al mediudía sedrá más seliquino, sin nubes y sol asgaya.
El sábadu templará con un ascensu moderáu de les temperatures másimes que sedrá más discretu nes mínimes, seguiremos esfrutando del sol y l’aire sedrá sele ya variable.
El domingu entama a estropiase con un aumentu de la nubosidá pero sin precipitaciones en principiu con unes temperatures mínimes n’ascensu por mor de les nubes y unes másimes en descensu.
Y de cara al llunes y la selmana entrante entovía hai munches duldes. L’ascensu del anticiclón hacia l’atlánticu norte va a favorecer el desaloxu d’una masa fría dende l’Árticu,anque tovía los modelos meteorolóxicos nun son a ponese dalcuerdu, onde va cayer finalmente, unos la empovinen enriba nuesu y otros la tiren enfrente de les costes gallegues, dando como resultáu un pronósticu totalmente dixebráu ún d’otru, por esto como solemos dicir «yá lu diremos viendo».

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *