Nacho Manzano, de La Salgar al mundiu enteru
Llevar l’alta cocina a una aldea asturiana nun ye fácil, pero poques coses hai más prestoses que ver esperar a coches d’alta gama a qu’acaben les vaques nel bebederu.
Llegar a La Salgar nun ye fácil, una carretera comarcal enllena de rellavicos, a namás 5 kilómetros de Les Arriondes, onde vas ganando altor con cada revuelta. Ellí, ta asitiada Casa Marcial, el nuesu restorán más nomáu, con 3 Soles Repsol y 2 Estrelles Michelín.
Nacho Manzano criose nesa casa, ente fogones, cuando yera un chigre-tienda-llagar onde daben de comer por encargu, al pie de la carretera qu’aunía Les Arriondes con Ribeseya pasando pel Fitu. Sollerte a les vivencies de Marcial y Olga, sos pas; y les sos güeles, deprendió a cocinar.
Foi a los 13 años cuando-y dio por poner enriba los famosos tortos de so ma, un revueltu de cebolla y quesu cabrales pa ofrece-yoslos a unos clientes y tuvo tanto ésitu, que tres la so formación mientres 5 años en Casa Victor, cuando tornó al llar, a so casa, a Casa Marcial, pa entamar so propiu restorán, xunto coles sos hermanes Esther (otra Estrella Michelín nel restorán La Salgar, en Xixón) y Olga, decidió qu’esi platu nun podía faltar enxamás de la so carta.
Ésa ye una de les sos especialidaes, amestar tradición con un toque de xenialidá, encumando siempres el productu asturianu. Cuando nun esistíen les (bendites, pa dalgo que mos favorez…) modes del Km0 ya’l productu llocal, el menú degustación de Casa Marcial viaxaba yá pel mundiu alredor del productu asturianu. Vivir cerca del Pienzu ye lo que tien, qu’abárcalo too: acolumbrar el Cantábricu, xirar y casi tocar los Picos d’Europa. Arroz con Pitu Caleya, llámpares, croquetes, fabada, pexe, caza … Formen davezu los sos menúes degustación y la so carta, ensin los complexos qu’amuesen otros ensin la metá del so talentu.
Llevar l’alta cocina a una aldea asturiana nun ye fácil, pero poques coses hai más prestoses que ver esperar a coches d’alta gama a qu’acaben les vaques nel bebederu mientres les pites escarabaxen, y ye que pa los turistes, el viaxe hasta la Salgar ye un ingrediente más del so ésitu; o ver a asturianos emocionase probando sabores de siempres, pero 4 pasos más allá, pura memoria d’aldea y mar.
De La Salgar, al mundiu enteru, empezando por Xixón, onde abrió un restorán xunto cola so hermana Esther, del mesmu nome que la so aldega: La Salgar, y, qu’al pocu d’abrir, algamó tamién 1 Estrella Michelín. Y d’ehí, vinieron los sos restoranes Gloria, n’Uviéu y Xixón, como homenaxe a so güela, la gran guisandera que-y enseñó a facer patates guisaes, y que siempres quiso tener un restorán propio. Tamién la so internacionalización con 5 restoranes en Llondres, como sociu y direutor gastronómicu, so propiu catering pa bodes y eventos. Y va pocu, Narbasu na maravía del Palaciu de Rubianes (Piloña).
.
La RAG (Real Academia de Gastronomía) acaba de nomalu Premiu Español de Gastronomía, que reconoz al profesional de cocina col trabayu más destacáu nun restorán mientres l’últimu añu. Diz d’él so presidente, Ferrán Adriá, ún de los meyores cocineros del mundiu, que «Lo tiene todo: una calidad gastronómica brutal, visión internacional, grandes dotes empresariales y una trayectoria impecable». Esti premiu llega a los 50 años de Nacho, y esperemos que-y llegue tamién de regalo la tercer Estrella Michelín de Casa Marcial.
D’una aldea al ésitu mundial, ensin perder los raigaños, arrodiáu de la familia como un pegollu fundamental na so vida y na so carrera, apostando polo de casa, pol productu llocal, encumando la cocina asturiana dende la so tradición, y too dende La Salgar, esi pueblín al que llegues per una carretera comarcal enllena de rellavicos, a namás 5kms de Les Arriondes. ¿Ye pa tar o nun ye pa tar arguyosu?
