Semeya obra d’Alex Nafría.
La ‘Terminoloxía de Cine’ ye la ventena primera propuesta del proyeutu TermAst de l’Academia de la Llingua Asturiana. Encargóse de la mesma Pablo A. Quiroga Prendes (Uviéu, 1978), cineasta y miembru de l’Academia del Cine Asturiano, énte la necesidá de “poner llendes al usu d’anglicismos y dar una propuesta de solución a los problemas terminolóxicos del asturianu nos estremaos contestos comunicativos”, con cerca de 400 entraes cola so correspondiente definición.
¿Por qué una propuesta terminolóxica sobre’l cine?
La idea cimera de TermAst ye la ellaboración de propuestes terminolóxiques d’aplicación a los nuevos usos de la llingua asturiana y la disponibilidá de consulta al traviés d’una estaya concreta dientro de la páxina web de l’Academia de la Llingua Asturiana. Tamos nuna dómina onde les emisiones y percepciones audiovisuales son la mayor fonte de comunicación social. Poro, el cine ta anguaño presente nel día a día de toles persones. Vimos la necesidá de trabayar nun pallabreru normativizáu cola fin de, na medida de lo posible, poner llendes al usu d’anglicismos y dar una propuesta de solución a los problemas terminolóxicos del asturianu nos estremaos contestos comunicativos. Agora hai que da-y visibilidá y entamar a remanalu correutamente.
¿Cómo surdió la posibilidá de trabayar nella?
Foi por petición espresa de l’Academia. Había una carencia de terminoloxía propia de l’audiovisual y tuvieron a bien que fuera yo la persona que trabayara nesti proyeutu.
¿Pa quién ta dirixíu esti pallabreru?
Como toles terminoloxíes espublizaes, ta al algame de cualesquier persona que quiera, nun momentu dau, trabayar nesta temática. Yo plantego esti TermAst pensando nuna producción cinematográfica, profesional o non. Sicasí, valnos pa trabayar l’audiovisual nes aules, nos medios de comunicación, nos certámenes y festivales…
¿Cuántos términos recueye?
D’esta primer vez metí, creo recordar, qu’al rodiu de 380 términos. Ye verdá qu’en tando espublizáu dime cuenta de que nun metiera dellos otros mui básicos…, pero ésos pa la segunda edición.
¿Cuáles foron les principales dificultaes qu’atopó al ellaboralu?
Lo primero’l decidir la base léxica. De primeres pensé que lo meyor yera tirar de los oríxenes del cine y remanar los términos franceses. Y ye verdá que per esi camín avancé abondo. Pero claro, dempués llegó la era del cine americanu y había cosines a trabayar dende l’inglés…
Hubo dellos términos que tenía bien nidio cómo debíen plantegase nel TermAst, por exemplu ‘filme’ en cuenta de lo qu’en castellanu dicen ‘película’. Hai qu’estremar ente lo que ye la obra cinamatográfica, filme, de lo que ye’l soporte onde se pueda filmar, película. Tuviéramos Pablo Casanueva y yo dellos alderiques nesti sen y llegamos a la mesma conclusión. Ye un términu que vienen usando un bon puñáu de les y los creadores n’Asturies.
Lo mesmo con ‘filmar’ en cuenta de ‘grabar’. Tu vas perhí cola cámara y cualquier paisana o paisanu pregúntate, amás de cúando va salir eso na TPA, que qué ye lo que tas filmando, nuncan nun te falen de grabar. Por embargu, hai otros términos a los que tuvi que dar más vueltes y buscar les soluciones propuestes n’otres llingües cercanes pa poder dar la propia.
Ésta ye la ventena primer propuesta de TermAst. ¿Cree que cumplió los oxetivos colos que nació?
Sienta les bases. Agora ye cuando la xente tien qu’usar esta terminoloxía propuesta o non, que ye l’oxetivu cimeru.
¿Cómo respondió’l sector a la suya?
Bien, nesti curtiu percorríu temporal entá nun hubo muncha quexa poles propuestes… Que bastante ye.
¿Ye’l cine la estaya artística pendiente pal asturianu?
Como dicía de primeres, tamos nuna dómina onde les emisiones y percepciones audiovisuales son la mayor fonte de comunicación social. Gracies a les ferramientes propies del cine, esos preseos colos que constuyir la narrativa del filme, esto ye, la propia imaxe y los trucos y artificios colos que les arriquecemos, los soníos, la música…, la persona que se sienta énte la pantalla, casi ensin reparar en planos, escenes y secuencies, ensin reparar nel llinguaxe propiamente fílmicu, capta estremaos mensaxes que faen del cine, al mio entender, la forma de tresmisión interxeneracional más completa dientro de los medios que s’emplegaron hasta agora.
Ye verdá que tamién tenemos les redes sociales y los sos usos perhí… que, quiciabes, ganen terrén… Asina que sí, ye necesario más cine n’asturianu, en cualesquiera de los xéneros y formatos. Valme falar de filmes de ficción, documentales, curtiumetraxes, series, programes televisivos…
¿Qué fadría falta pa contar con más producciones nel nuesu idioma?
Lo primero que les persones que faen cine quieran trabayar nello. Y después, o antes, pues tener xente formao qu’use bien les llingües propies d’Asturies. Ye necesario la presencia de formación llingüística na ESAD, potenciar la formación llingüística nes estremaes FPs, meyorar la presencia de l’asturianu y l’eonaviego nos IES, na Educación Primaria y na Educación Infantil… Ye necesario concienciar a les productores, directores, guionistes…
Nos caberos 20 años nun hubo un espoxigue nesti sen, anque hubiere una base importante de realizaciones nos finales de los 90 y entamos de los 2000, y un apoyu esplícitu de festivales, de la conseyería per un tiempu, curtiu, de dellos ayuntamientos… Ye verdá que la falta d’una industria cinematográfica ye lo que llastra esti crecimientu.
Por cercanía y asemeyances, ¿Galicia debería ser l’espeyu?
Dende l’Academia del Cine Asturiano tamos en continuu contautu con otres academies de cine peninsulares de les que vamos deprendiendo y conociendo realidaes. Por exemplu, de l’Academia de Andalucía vimos la importancia que tendría el desendolcu d’una Llei del Cine d’Asturies, y cómo al travíes d’esa llei construyir una industria que dea riqueza a Asturies y a les persones que trabayen equí.
De Galiza podemos querer aspirar, ente otres coses, al modelu de televisión con producción propia de series, por exemplu… Pero la financiación de TVG y TPA son del cielu a la tierra. Ye mui difícil algamar esos niveles de gastu si nun hai una financiación previa qu’apueste por esta industria y pola riqueza que podría traer a Asturies.
La creación de l’Academia del Cine Asturiano, ¿qué supunxo pal sector cinematográficu asturianu?
L’Academia del Cine Asturiano yera un pasu necesariu pa volver a alcontranos les persones que d’una manera u otra tamos venceyaos al cine n’Asturies. Yeren munchos años yá cola xente deslligada ente sí, ensin unes persones saber d’otres… Tábemos perdiéndonos los trabayos de calidá que taben y tán faciendose dende Asturies, perdiéndonos los nuevos valores que trabayen na industria y tienen la so casa equí.
Les I Xornaes del Cine Asturiano que ficimos al entamu del branu en Xixón son un bon exemplu d’esti necesariu reencuentru. L’Academia quier ser la casa de toes y toos, y tamién quier trabayar en poner en valor y meyorar la situación de la industria n’Asturies.
Na faceta personal, ¿ta trabayando anguaño en dalgún proyeutu?
Pa setiembre cuento con presentar un documental nuevo al rodiu de la mina de fierro de Llumeres, en Bañugues. Nel documental quixi somorguiame na hestoria d’una comunidá, d’un pueblu, que tuvo la mina de fierro como exa sobro’l que pivota la vida de delles xeneraciones. La mina peslló va más 50 años, en 1967, y tuvi la suerte, gracies a la Asociación El Curbiru, de falar y tomar testimoniu d’antiguos trabayadores de la mina, les sos families y vecinos y vecines que nos falen de la evolución del trabayu na mina, pero sobre too de les tresformaciones paisaxístiques, polítiques y sociales, faciéndonos asina cavilgar sobro la rellación ente’l ser humanu y el mediu nel que vive.
