El 10 d’avientu celebra tolos años el Día de los Derechos Humanos, coincidiendo col aniversariu de la Declaración Universal de Derechos Humanos, que s’aprobó en 1948. Foi dos años dempués de l’aprobación, en 1950, cuando l’Asamblea Xeneral proclamó’l 10 d’avientu como’l Día de los Derechos Humanos.
Los derechos humanos, son derechos inalienables y que pertenecen a tolos seres humanos, ensin importar la so raza, sexu, nacionalidá, llingua, relixón, orixe étnicu o cualesquier otra condición.
Anguaño esiste una llista de derechos humanos creada pola Organización de les Naciones Xuníes, onde se defende’l derechu a la vida, la llibertá, a la educación, al trabayu y munchos otros más, que tienen de ser respetaos ensin qu’esista discriminación dalguna.
La Declaración Universal de los Derechos Humanos
«Tolos seres humanos nacen llibres ya iguales en dignidá y derechos»
Ye’l testu del artículu 1 de la Declaración Universal de Derechos Humanos. En base a esta premisa, la Declaración proclama los derechos inalienables inherentes a tolos seres humanos, ensin importar la so raza, color, relixón, sexu, idioma, opiniones polítiques o d’otra índole, orixe nacional o social, propiedaes, llugar de nacencia nin nenguna otra condición.
Ye’l documentu más traducíu del mundu, disponible en más de 500 idiomes. Por ello tien un Record Guiness. Anque queda enforma camín por percorrer por que los derechos que nél s’esponen sían respetaos en tol mundu, el fechu de que perdure entá esti documentu ye signu inequívocu de que se-y reconoz el so valor per parte de los Estaos y de la sociedá polo xeneral.
La muyer, al traviés de la hestoria, desempeñó un rol fundamental en tolo tocante al desenvolvimientu y meyora de la humanidá. Unu d’ellos foi la so participación na creación del documentu por que fuera posible la Declaración de los Derechos Humanos. Una d’estes muyeres foi Eleanor Roosevelt, primer dama de los Estaos Xuníos, embaxadora, delegada y presidenta del comité de l’Asamblea Xeneral de les Naciones Xuníes. Otra importante líder femenina foi Hansa Mehta, d’orixe hindú, lluchadora incansable de los derechos de la muyer y mundialmente conocida pol so célebre frase «Tolos seres humanos nacen llibres ya iguales». Tamién quepe mentar el trabayu de muyeres como Begum Shaista Ikramullah, nacida en Pakistán, quien propunxo la igualdá de derechos nel matrimoniu para acabar col matrimoniu infantil y non deseyáu. Pero la llista nun acaba, Lakshmi Menon y Minerva Bernardino, conocíes por defender la igualdá de derechos d’homes y muyeres. Evdpkia Uralova, quien abogó pola igualdá salarial. Marie-Helene Lefaucheux, defendió lo non discriminación sexual y Boddil Begtrup, quien propunxo la inclusión de los derechos de les minoríes.
