https://musicasturiana.com/wp-content/uploads/2023/04/folixa-na-primavera-2023-cartelu.jpg
El próximu fin de semana aporta una nueva edición de la Folixa na Primavera. Tonada, baille tradicional, música coral, rock n’asturianu, folk celta, electrónica de raigañu, bandes de gaites, bandines y cantares de chigre dan forma a una programación que va enllenar Mieres de música asturiana los díes 21, 22 y 23 d’abril. Too ello va tar acompañao d’otres actividaes pa un públicu de toles edaes nes que la sidra, la gastronomía y la cultura’l país son el puntu d’alcuentru.
El protagonismu de la música asturiana entama yá dende’l pregón que va dar Jorge Areces, profesor de gaita y director de la Banda Gaites Villa de Mieres, el vienres 21 a les 20.30h nel Parque Xovellanos. Esto va dar pasu a L’Entamu (vol. Raigaños Mineros), nel que van xubir al escenariu los artistes y agrupaciones Antón Menchaca, BG Villa de Mieres, Coral Cantares, Coru Mineru de Turón, L’Artusu, Liliana Castañón, Orfeón de Mieres, Prau Llerón y Ruxidera. Dempués de la tonada, la música coral y el folcor, llega’l turnu de la electrónica del país coles actuaciones de Llevólu’l Sumiciu (23.30h) y d’Algaire a la medianueche, que va dar un conciertu especial con xente convidao.
Los desfiles y los pasacais van percorrer les cais de Mieres na mañana del sábadu 22. A les 13.30h desfilen los grupos folclóricos L’Artusu, Ruxidera y Prau Llerón; la BG Villa de Mieres y la Banda de Música del conceyu. A les siete el Parque Xovellanos vuelve enllenase de música cola Tarde en Danza amenizada por La Garrapiella. Esta bandina va calecer l’ambiente pa lo qu’aporta a les 21h y que se va allargar hasta la madrugada; los conciertos de Llan de Cubel, los escoceses Wolfstone y Dixebra. Tres formaciones con más de 30 años de trayectoria que representen lo meyor del rock y folk celta.
Pa rematar esti folixón el domingu 23 a les 12.30h va haber tonada y cantares de chigre na Plaza Requexu y na cai Jerónimo Ibrán. Una hora dempués desfila la Banda Sinfónica del Atenéu Musical de Mieres y a les dos de la tarde los Pandereteros d’Anguaño rematen el programa musical d’esti eventu tan pernomáu y necesariu pa la cultura’l país.
Reconocimientu a Prau Llerón
D’otra banda, l’asociación Mierenses del Año ta acabante de conceder la Placa de Honor al grupu de baille tradicional Prau Llerón, agrupación mierense que lleva puxando pola cultura y el baille de raigañu dende 1980.
https://musicasturiana.com/wp-content/uploads/2023/04/folixa-na-primavera-2023.jpg
https://musicasturiana.com/wp-content/uploads/2023/04/folixa-na-primavera-2023-2-1536×768.jpg
