Publicado en Día de...

Día de les Escritores

Dende 2016 vien celebrándose el llunes más cercanu al 15 d’ochobre’l Día de les Escritores. La celebración d’esti día surdió coles mires de recuperar y resaltar el legáu de les escritores, amás de visibilizar les obres de les muyeres na lliteratura.Wiki/imáxenes. Escritoras.

Agora bien, ¿por qué esi día y non cualesquier otru? Tou tien que ver cola festividá de Santo Teresa de Jesús, que ye patrona de los escritores españoles.

La Biblioteca Nacional d’España celebra esti día, una iniciativa entamada en collaboración cola Federación Española de Muyeres Directives, Executives, Profesionales y Empresaries (FEDEPE) y cola Asociación Clásicu y Modernu, coles mires de reivindicar el llabor y el legáu de les escritores a lo llargo de la hestoria. Como n’ediciones anteriores, la fecha escoyida ye’l llunes más cercanu a la festividá de Teresa de Jesús (1515-1582), que se conmemora’l 15 d’ochobre.

La celebración d’esti día busca sacar a les escritores y los sos trabayos a la lluz, dexando tras la discriminación y l’olvidu pol meru fechu de ser muyeres. Amás, búscase que toles persones conozan la gran variedá d’escelentes escritores y sobresalientes obres apostraes a un segundu planu. Para ello plániense y realicen distintes actividaes y eventos para resaltar el trabayu de les escritores y reivindicar y sacar del olvidu a les muyeres na lliteratura.

«El legáu de les autores ye inmensu, pero la visibilidá femenina nun se correspondió nunca de manera xusta con él. Y esto nada tien que ver col méritu del so trabayu nin cola calidá de lo escrito, sinón colo que-yos quepe esperar d’una sociedá que decide cómo valorales en función, namá, del xéneru al que pertenezan.» [Blogue BNE]

A éstes ¿sabíes que munches muyeres escribieron so seudónimos masculinos por que los sos trabayos y llibros tuvieren la reconocencia que merecíen? Muyeres emburriaes al anonimatu o a despintar el so verdaderu nome. Como, por casu, la escritora británica Mary Ann Evans, les hermanes Brontë o Cecilia Böhl de Faber y Ruiz de Larrea. Santo Teresa de Jesús foi una monxa, mística y escritora española proclamada como patrona de los escritores españoles per San Pablo VI.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *