- Fonte: Refuelgu.com / Cartelu de Dam Fernández
La organización de l’AsturCON anunció ayeri’l llugar ónde va celebrase la so segunda edición, y esti ye’l Centru de Cultura del Antiguu Institutu de Xixón los díes dos y trés d’avientu (sábadu y domingu).
La primer AsturCON d’esta dómina nueva (organizáronse otres va munchos años) celebróse na Llaboral Centru d’Arte va cuasi yá un añu, a mediaos del avientu pasáu. La idea que taba detrás, que fuera un alcuentru d’autores, editoriales y llectores de fantasía d’Asturies col envís de producir sinerxes creatives. L’asistencia superó les espectatives de los trés organizadores o “Lord Protectors”, los autores Dam Fernández, Xon de la Campa y Adrián Carbayales, y ye por ello que pa esti añu decidieron facela más céntrica, con envís d’afitar l’ésitu del eventu.
Cómo yá se fizo l’añu pasáu, la idea ye organizar meses de debate sobre temes lliterarios nes que participen dellos autores con dalgo en común, qu’haya speed dates nes que los aspirantes a escritores puean presentar los sos manuscritos a les editoriales, y tamién la entrega del Premiu Fontenebrosa a meyor novela asturiana, galardón creáu l’añu pasáu y que garra’l nome de la triloxía de fantasía de Vicente García Oliva.
