- Fonte: Música Asturiana
- Ígor Medio: bio / web / Tebeosfera / semeyes
Esti 2022 Ígor Medio cumpliría 50 años. Tres del so fallecimientu n’accidente de tráficu cuando viaxaba xunto col grupu que fundó, Felpeyu, yá son 16 los años ensin esti dibuxante de cómics y músicu fundamental na historia de la música contemporánea asturiana. Del 3 al 6 de mayu la Selmana de les Lletres Asturianes va homenaxealu con una programación na que destaca un conciertu homenaxe nel que van participar más de 20 músicos enriba l’escenariu, una jam session, la publicación y regalu d’un llibru conmemorativu, l’estrenu d’un documental y d’una esposición n’alcordanza del xixonés, amás d’una mesa redonda alrodiu la so figura.
El martes 3 de mayu a les 12h inaugúrase nel Paraninfu de Llaboral Ciudá de la Cultura la 43 Selmana de les Lletres Asturianes cola presentación de la obra conmemorativa ‘Ígor Medio. El carbón y l’arena’, que se va regalar el 6 de mayu con toles compres de discos y llibros n’asturianu y qu’axunta nueve artículos qu’analicen l’heriedu d’esti creador y incluye bien de testimonios gráficos de la so vida y obra-. Tamién va proyectase’l documental ‘Onde soi quien quiero ser. Una semblanza d’Ígor Medio’. Esi mesmu día, a les 18h y nel Muséu Barjola de Xixón, inaugúrase la esposición ‘Xente llano de Xixón. La obra gráfica d’Ígor Medio’ con una jam session na que van participar Alberto Ablanedo, Rubén Bada, Pepín de Muñalén y Dolfu R. Fernández; músicos curtíos en milenta formaciones folk y que pertenecen a la mesma xeneración que’l homenaxeáu.
El miércoles 4, a les 20h na Llaboral de Xixón, va tener llugar l’actu principal d’esta Selmana de les Lletres: El Conciertu d’Igor Medio. Felpeyu xunto con músicos de Tuenda, DRD, La Bandina’l Tombo y Corquiéu, acompañaos de José Manuel Tejedor a la gaita; Mapi Quintana a la voz y contrabaxu; Bree Delian, Xuan Nel Espósito y Félix Castro al cordión; Alberto Sánchez y Isidro Suárez a la flauta; Toño Gómez al vigulín y Xel Pereda a la guitarra y voz; van xubir al escenariu del que promete ser un conciertu históricu y mui emotivu. Les entraes son de baldre anque ye necesario sacales anticipaes a partir d’esti miércoles en Llaboral Ciudá de la Cultura, nel Centru Niemeyer, nel Centru d’Información Turística del Principáu d’Asturies, nel teléfonu 985.96.97.08 o na web d’entraes de Liberbank (Unicaja Banco).
Pa rematar los actos la Orquesta Sinfónica del Principáu d’Asturies (OSPA) va dar el xueves 5, a les 20h, el conciertu de música clásica del Día de les Lletres nel Auditoriu Príncipe Felipe, y el vienres 6 va facese la mesa redonda ‘¿Ónde andaría Ígor? El cómic asturianu güei’, a les 18.30h, nel Muséu Barjola de Xixón. L’alderique modéralu Chechu García y nél participen Raquel Lagartos, Ruma Barbero y Ernesto García ‘Neto’. Esi mesmu vienres, Día de les Lletres Asturianes amás de regalase’l llibru conmemorativu d’Ígor editáu pola Conseyería de Cultura, Política Llingüística y Turismu, nel Navia-Eo va regalase’l llibru ‘Contos eonaviegos’, una escoyeta de 28 rellatos d’otros tantos autores publicada pa la ocasión.
Una figura imprescindible
Dende l’añu 1980 celébrase cada mes de mayu la Selmana de les Lletres Asturianes, homenaxe públicu y institucional a la creación lliteraria en llingua asturiana. Ye un eventu nel que s’axuntan lo lliterario, lo festivo y lo institucional y nel que participen de manera especial los centros educativos, les llibreríes, les editoriales, los escritores o los medios de comunicación. Esti 2022 ye la primer vez qu’esti eventu homenaxea a una persona nacida na década de los setenta del sieglu pasáu y nel diseñu del programa d’actos participaron el tamién músicu y autor de cómic Ruma Barbero de Diego, quien en 1991 fundó Felpeyu con Medio, amás de por Norman Fernández Tascón, que ye autor de delles monografíes sobre historieta, amás de comentarista y articulista sobre cómics y collaborador habitual de la Semana Negra de Xixón y d’otros eventos sobre’l cómic asturianu.
El dibuxante, guionista de cómic y músicu Ígor Medio (1972-2006) realizó cola so estensa obra una contribución esencial al cómic n’Asturies, creando mundos qu’inda perviven nel imaxinariu colectivu, ente los que destaca la familia Castañón, una tira cómica que se publicó ente 1997 y 2005 nel suplementu de branu del diariu La Nueva España. Foi tamién collaborador en fanzinos y revistes como El Llapiceru, El Wendigo o Esquit y corresponsable de cómics de sonadía como Love Gun.
Amás de con Felpeyu, l’artista xixonés desenvolvió tamién un trabayu intensu como productor de discos d’artistes y grupos asturianos como Flavio Rodríguez, Gatos del Fornu o Tejedor. Nel 2003 foi cofundador de la discográfica y editorial Tierra, qu’asoleyó dellos de los discos más destacaos del folk asturianu, ente ellos ‘Dual‘, trabayu de cultu de folk de cámara que grabó xunto al so compañeru de Felpeyu y Tierra Discos, Lisardo Prieto.
