TENÍEMOS UN PALACIU
Teníemos un Palaciu…
Frayánonnos les ventanes con grandes mayos de fierru.
«Nun vos preocupéis», dicíennos,
«Podéis siguir viviendo en Palaciu…»
Esboroñánonnos darréu les paredes
Con furia, a pataes y puñetazos,
Pero fonon bonos y nun quixenon echanos del Palaciu…
«Nun vos preocupéis», dicíennos,
«Podéis siguir viviendo en Palaciu…»
Chanon abaxo entós les puertes de madera de castañu
Col hachu vieyu de fender la lleña
Y blincanon gayasperos enriba’l techu hasta fundilu,
Hasta dexanos a teyavana…
Y dempués llovió, y cubriénonlo too los escayos,
Que medranon al aire y al orbayu…
Y volvienon darréu y esta vez dixénonnos:
«¿De qué Palaciu faláis…?»
Y tamién
«Nunca hubo Palaciu…»
Y dixénonnos esta vez:
«El vuestru Palaciu nun ye Palaciu,
Que nun ye siquiera
Una miserable corripa onde comer los gochos
La esllava que-ys damos nuna duerna puerca
De madera podre…»
Y dixénonnos
«Tenéis que marchar d’equí…»
Y nós marchemos…
Teníemos un Palaciu…
Autor: Pablo Suárez García. El doctor el Filoloxía nacíu n’Udrión en 1973 ye l’autor de la torna al asturianu del Quixote y de Tirán el Blancu. Pablo Suárez espublizó en 2012 la so torna del clásicu del Sieglu d’Oru valencianu ‘Tirant lo Blanch’, de Joanot Martorell, y l’añu pasáu consiguió ver asoleyada la so versión de les aventures del Quixote n’asturianu gracies a la iniciativa d’Ediciones Laria.
Reproducimos una entrevista que l’academicu dio a Asturies.com con motivu de la edición de Tirán el Blancu