Publicado en Música

Carlos Rubiera saca’l tercer discu de la serie “Asturianaes”

 Llibro + 3CD´s con 3h de Nueva Tonada Astur (conseguir equí)

30 Asturianaes de Carlos Rubiera: Una obra maestra del cantar asturianu de Carlos Rubiera. Cola collaboración de grandes figures de la música asturiana actual: José Angel Hevia, Mª José Hevia, Javier Tejedor, Xuacu Amieva, Mariluz Cristóbal, Rafa Lorenzo, Almudena López (Cantabria), Gabino Antuña, Óscar Camacho, Coral Villa Blanca de Luarca y otras voces e instrumentistas de primer nivel.

–Físicamente, ye un llibru y trés CDs con ’30 Asturianaes’. Un pocu menos de la metá del repertoriu son asturianaes clásiques, revisaes por mi tocantes a la lletra y l’instrumentación, bien llevaes al terrén de la música culta, del lied. Y, dempués, hai daqué más de la metá del repertoriu que son composiciones mios, delles llevaes más al terrén del nuevu folk y otres tamién n’una llínea totalmente clásica.

–¿Y, creativamente, qué supon para usté esti partu?

–Esti trabayu ye la obra de la mio vida, un proyectu nel que llevo trabayando venti años, porque yá interesé pola asturianada fai enforma tiempu y atrevíme a grabar nel 89 ‘Tengo de xubir al puertu’. La pieza, en conceutu, quedó perfecta, pero la mio voz, d’aquella, yera la voz d’un cantautor. Yo cantaba como Divos dábame a entender. Con una voz chiquitina, bien estrecha, y que siempres diba buscando la parte aguda. Yera lo que sabía faer. Nun había estudiáu cantar inda y dábame cuenta de que la la mio voz nun daba pa cantar asturianada, que rique una voz bien potente, con xunes cualidaes de impostación y redondez que yo nun tenía. Yo d’aquella cantaba atenorao. Hasta qu’estudié seis años canto col maestru Ramón Alonso y sacóme la voz de barítonu llíricu. Y, cuando empecé a tener esa voz, a partir del tercer añu, sí qu’empecé a poder enfrentar a l’asturianada de verdá y con otra solvencia.

–¿L’asturianada va a menos?

–L’asturianada ta amenorgada a un ciertu guetu. Ye un cante que quedó un poquitín nunos ambientes amenorgaos, que nun ta digamos nel mundu modernu, onde circulen otros tipos de músiques. Tien un públicu bien fiel, non tan poco numberosu como podría pensase, sinón relativamente ampliu. Y, nesi sentíu, ta bien viva. Lo que sí ye verdá ye que quiciabes taba daqué anquilosada nos concursos de tonada, nos que los cantantes tán un poco obligaos a siguir a los grandes clásicos de la tonada de principios de sieglu.

–Anque tamién hai quien vien anovando. Ende tien, por casu, a Rodrigo Cueves.

–Son intentos de retomar la música tradicional y facela d’otra manera, pero, si trabayes una asturianada tradicional y llevala a un puntu con muncha influencia d’estilos musicales modernos, cuerres el riesgu de sacala dafechu de contestu, de que se pierda la esencia y de desvenceyala del raigañu.

–Y entós los puristes échensete enriba…

–Y, probablemente, con razón. Entós, hai que buscar esi equilibriu. Yo, en realidá, lo que fixi foi llevala a un terrén que yá habíen trabayáu los grandes maestros del sieglu pasáu, que ye la música de conciertu o la música culta, na llínea del lead, del cantar llíricu clásica.

–¿Usté qué escucha?

–Fai munchos años que cerré la ventana. Yo nun quiero escuchar música davezu como la xente qu’esta trabayando y pon música. Porque la cabeza, a la fin, ye como una formigonera, y lo qu’eches allá acaba saliendo na to propia obra. Entós, procuro oyer bien poco. Solo aquello que m’interesa. Na mio casa enxamás tengo la radio puesta, nun tengo tele de camín, y, poro, nun me pueden bombardear, y, cuando voi a un supermercáu y tengo ellí esi bombardéu de música, por cierto bien mala, estranxera, procuro poner unos tapones nos oyíos pa que me allorie lo menos posible. Lo que m’alimenta a mi, en realidá, ye el silenciu.

–Na so triloxía aliméntase tamién de la crème de la crème de la música asturiana.

–La verdá ye que toi descomanadamente estimáu a tol elencu de músicos que collaboraron con estos trés CDs, que ye totalmente estraordinariu. Son, en total, ventiséis y hai nomes tan destacaos como los de José Ángel Hevia a la gaita; la so hermana María José, una percusionista arrogante; el maestru gaiteru Xuacu Amieva; Mariluz Cristóbal cantando tamién; Javi Texedor, un acordionista escepcional; Diego Pangua; Flavio Rodríguez Benitu; el gaiteru y musicólogu Llorián García Flores; una voz cántabra maraviyosa que ye la d’Almudena López; el cantautor Rafa Lorenzo;los pianistes Gabino Antuña y Óscar Camacho; la Coral Villa Blanca de L.luarca… Bonu, hai que velu.

«Cascos supo engañanos»

–Y, tou, con un paréntesis p’asumir la Conceyalía de Cultura xixonesa con Foru. ¿Qué pensó cuando supo lo que se supo dempués d’Álvarez-Cascos?

–Esa parte final de l’apaición del pícaru detrás de lo que paecía un home d’Estáu y un intelectual fíxome casi rir. Nun dexa de ser murniu, porque munchos miles d’asturianos creyeren na so propuesta. Evidentemente, tontu non ye y fízolo perbién. Supo engañanos con un discursu que paecía creíble y bien razonable. Pero bonu, a mi yá un poco a toru pasáu y nun lo viví dende dientro.Ye un episodiu bien murniu, supongo, pa los que siguieron ende, creyendo nel proyectu. Pa Moriyón y el so equipu…

–Abandonó temporalmente la so plaza como docente pa trabayar a trés veces. ¿Represu?

–Nun hai que arrepentise. Sía que non, sacar enseñances. Fueron años bien duros pa mi dende’l puntu de vista intelectual y hasta físicu. Trabayé bien de. Pero foi una esperiencia que m’arriqueció tamién como persona y entiendo que sería bonu que tolos ciudadanos pasaren por ella igual que se pasa pola presidencia de la comunidá de vecinos. Yo entiéndolo siempres asina: como una especie d’actu de serviciu mientres un periodu.

–Pero tuvo tiempu pa metese nel tolos charcos: FICX, Xovellanos, Arco Atlánticu…

–¡Buf! Porque había muches cueses que non estaben nel so sitiu y qu’había qu’endrechar. Y algunes d’elles, obviamente, endrecháronse. El casu del Xovellanos ye clarísimu. El Arcu Atlánticu yo púselo a disposición de la ciudá. Nun fixi como fixeron otros, rexistrar la marca al mio nome o a nome d’una asociación privada, sinón que ye una marca rexistrada a nome del Conceyu de Xixón. Que los sos actuales responsables prescindieren d’él son ellos los que lo tienen qu’esplicar. Pero yo diríate, como Estragal, que vini falar del mio llibru (Ri).

Autor:

Maestra de Llingua Asturiana Colexu Carmen Ruiz-Tilve - Uviéu