Bonos díes, bona xente.
Alborecemos col cielu cubiertu pol borrín y la nublina na fastera central asturiana ya con nubes y grandes claros o albancios nel restu con unes temperatures que tan alrodiu de los 12ºC, rexistrándose nel puirtu Payares 4,5ºC con fuertes raches de vientu.
Güei vamos tener el cielu mui nuboso cola posibilidá de precipitaciones febles, disperses y ocasionales. L’aire sedrá molestu na cordelera, siendo sele nel llanu anque al finar del día tenderá a arreciar con unes temperatures en descensu.
- Fonte: El Tiempu n’Asturies
Mañana domingu seguiremos col cielu mui nuboso con precipitaciones que sedrán más frecuentes y abondoses que les que puean dase güei, amás les temperatures siguen baxando y la nieve va surdir perriba de los 2000m. Nel riscar entovía vamos tener raches fuertes de vientu pero a partir de l’alborada dirá amenorgando hasta quedar sele ya variable.
El llunes puen abrise dellos claros pero van quedar dalgunes precipitaciones residuales n’alborada con tendencia a desaparecer col trascursu’l día y abrise dellos claros, sobre too pela tarde con unes temperatures que baxan un puquiñín más, rondando la nieve pelos 1800m.
A llargu plazu nun se ve movimientu importante atmosféricu hasta dempues de reis, hasta entonces vamos tener predominiu de vientu gallegu col pasu de dalgunos frentes poco activos y temperatures suaves en xeneral, pero esto yá lu diremos viendo.
