Alborecemos col cielu cubiertu y xarabatos intermitentes con unes temperatures que tan alrodiu de los 7ºC, rexistrándose nel puirtu Payares -0,9ºC onde ta nevando.
Güei vamos tener precipitaciones frecuentes en forma de xarabatos que puen venir acompangaos de truena y xarazu nel llitoral y ser persistentes na cordelera con una cota de nieve que dirá baxando hasta situase al final del día sobre los 400m, dalgo más baxa na cabecera de los valles. L’aire dirá amenorgando anque tovía va caltenese con raches fuertes de componente oeste-noroeste.
Durante’l prósimu riscar va cruzanos una llinea de inestabilidá intensificándose los xarabatos en frecuencia ya intensidá con tronaes y xarazu pela costa y nevaes copioses en zones del interior asturianu perriba de los 300-400m, situación que va estendese a l’alborada y gran parte de la mañana del miércoles, remitiendo dalgo pela tarde cuando perderán fuelle los xarabatos en intensidá y frecuencia. Les temperatures en bultable descensu y l’aire sedrá de componente norte-noroeste con raches fuertes en zones altes de montaña ya en puntos del llitoral.
El xueves seguiremos con precipitaciones pero la masa fría yá habrá colau, sustituyéndola otra más cálida y subiendo la cota de nieve a los 1500m, quizá dalgo más anque pue quedar dalgo de fríu acumuláu faciendo que nun se dispare. El vienres tendremos menos precipitaciones y seguirán subiendo les temperatures y paez que’l sábadu puen volver a intensificase con una cota de nieve yá mui alta pero qu’al final volverá a baxar con un nuevu descensu de les temperatures pero esto yá lu diremos viendo.
¿ Va a nevar en zones como Uviéu? coles últimes actualizaciones de los modelos meteorolóxicos paez qu’hai mui poques posibilidaes, como falabemos el pasáu sábadu la masa d’aire fríu tien muncho recorríu marítimu y al pasar pel Cantábricu en capes baxes y medies de l’atmósfera se recalienta, amás la temperatura de la mar ta un o dos graos más alta de lo normal y paez que la temperatura a 850hpa nun va baxar tantu como se preveía fai unos díes, anque si se caltien n’altor. Con too nun tenemos suficiente fríu pa que nieve perdebaxo de los 400-300m anque pue facelo na cabecera de los valles por persistencia de les precipitaciones y orografía. Uviéu al no tar ente montañes, no fonderu d’un valle, el factor orográfico nos falla y son mui poco probables los desplomes de la cota de nieve. Pero bono la meteoroloxía siempre nos da sorpreses y si coincide un xarabatu llargu ya intensu nun se pue descartar que’n dalgún momentu del mesmu veamos una trapeada peles caies d’Uviéu.
