Publicado en Música, Premios

XIV Premiu Camaretá al Meyor Cantar

Algaire completa’l so gran añu col XIV Premiu Camaretá al Meyor Cantar con ‘Coral y maera’

Decimocuarta edición del Premiu Camaretá al Meyor Cantar, dende’l teatru de la Llaboral de Xixón, coles actuaciones de los tres grupos finalistes: Algaire, Mostru l’horru y Dixebra, y del grupu ganador de la edición anterior.

Carla Miranda, Iratxe Espina, Loreto Suárez y Juan Yagüe, o lo que ye lo mesmo, Algaire, completen un 2022 d’ésitu y confirmación como banda col XIV Premiu Camaretá al Meyor Cantar. Foi esti sábadu na gala final de la Llaboral, na que tamién participó Dixebra y Mostru l’Horru, con ‘Coral y maera’, cantar que da nome al so primer discu.

Con lletra y música de Luis Ángel Fernández Santos, esta pieza de temática amorosa pensada con un ritmu de xota pa facela tamién baillable y llevada a terrenos más pop convenció al xuráu d’esti gallardón, que tien como recompensa 6.000 euros, la realización d’un videoclip y la divulgación de la canción nos medios de comunicación y nos eventos entamaos o promovíos pol Gobiernu, amás de nel circuitu Autores nel Camín. Un ésitu que se suma a la victoria nel Trophée Loïc Raison de talentos nuevos que se desendolca nel marcu del Festival Interceltique de Lorient o la clasificación pa la final del Folkez Blai que se celebra na población vasca d’Ermua.

Algaire, que presentó una puesta n’escena con cinco músicos más y una pareya de baille, foron los primeros en defender el so cantar nuna final qu’abrió fuera de concursu Llevólu’l Sumiciu col acompañamientu d’Anabel Santiago. Dixebra salió depués del ganador con ‘Como’l mar’, firmada por Primi Abella, bada reforzada con Lluci Palomares (Corquiéu y Muyeres) y Bárbara González-Quevedo (Alienda y Muyeres), pa poner el ramu a esta parte de la gala Mostru l’Horru ‘con ‘Fíu d’un pueblu’, con lletra de Francisco Méndez y música de Yannick Gutiérrez.

Tamién actuaron na gala Tras el Muro, proyeutu musical de Carla Armas, ganadora l’añu pasáu xunto con Rubén García con ‘El que conoz a tierra’, cantar escritu na variante senabresa del idioma. Antón García, direutor xeneral de Política Llingüística y presidente del xuráu, dio’l fallu del ganador darréu y la propia Armas encargóse d’entregar a Algaire’l troféu del XIV Premiu Camaretá al Meyor Cantar.

García rescampló na so intervención que “podemos sentinos arguyosos de ver cómo camina’l Premiu Camaretá al Meyor Cantar y cómo añu a añu los grupos faen una puesta n’escena cada vez meyor”. La gala emitióse en direuto por TPA.

Finalistes

El grupu Algaire foi’l ganador del XIV Premiu Camaretá al Meyor Cantar n’asturianu que convoca la Conseyería de Cultura, Política Llingüística y Turismu. La banda femenina compitió col tema Coral y maera, un cantar con lletra y música de Luis Ángel Fernández Santos. El director xeneral de Política Llingüística, Antón García, foi l’encargáu d’entregar el gallardón a los ganadores del certame al términu de la gala na qu’actuaron los trés finalistes y qu’emitió la Televisión Pública del Principáu d’Asturies dende’l Teatru de La Llaboral.

El premiu, dotáu con 6.000 euros, incluye la realización d’un videoclip, amás de la promoción y divulgación del cantar ganador nos medios de comunicación y nos eventos entamaos o promovíos pol Gobiernu del Principáu d’Asturies, amás de nel circuitu «Autores nel Camín» del programa Asturies, Cultura en Rede.

Los otros dos finalistes de la nueche foronel dúu de rap Mostru l’horru, que formen Francisco Méndez y Yannick Gutiérrez y que participaron col tema Fíu d’un pueblu, de composición propia; y la banda de rock Dixebra, integrada actualmente por Xune Elipe, Primi Abella, Rubén Álvarez, Javi Rodríguez, Llorián García, Sergio Álvarez, Eladio Díaz y Agus Lara, que compitieron col cantar Como’l mar, con lletra de Primitivo Abella.

La XIV convocatoria del Premiu Camaretá al Meyor Cantar n’Asturianu qu’entama la Conseyería de Cultura, Política Llingüística y Turismu resolvióse la nueche del sábadu 22 d’ochobre nel Teatru de la Llaboral, en Xixón, nel trescursu d’una gala brillante, variada y mui riñida.
Abrió la gala, fuera de concursu, Llevólu’l Sumiciu, que contó cola collaboración d’Anabel Santiago. Los grupos que compitíen pol troféu del Camaretá y pol premiu de 6.000 euros fueron Algaire, Dixebra y Mostru l’Horru. Zarró la gala con un breve conciertu Tras el muro, el grupu que formaron Carla Armas y Rubén García depués de ganar l’añu pasáu esti mesmu premiu.
Nel trescursu d’esti conciertu reunióse’l xuráu qu’alcordó conceder el XIV Premiu Camaretá al Meyor Cantar al grupu Algaire pol so cantar «Coral y maera». El director xeneral de Política Llingüística y presidente del xuráu, Antón García, fizo anuncia del fallu y entregó’l troféu acompañáu de Carla Armas.
La TPA retresmitió la gala presentada por Fernando Valle Roso y Marta Elola.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *