Alborecemos col cielu cubiertu y lloviendo con unes temperatures que tan alrodiu de los 6ºC, rexistrándose nel puirtu Payares -2,2ºC onde ta nevando copiosamente faciendo que te peslláu pal tráficu pesáu, nel restu de la mayoría de puertos se fae obligatoriu l’usu de cadenes o neumáticos d’iviernu.
Güei vamos tener un día ivernal con xarabatos frecuentes ya intensos más probables durante la tarde cuando puen ser llocalmente fuertes y venir acompangaos de truena y granizu nel llitoral y fastera central asturiana con una cota de nieve que rondará los 900 m pero con desplomes nos valles de la cordelera hasta los 600-700m, sobre too pela tarde y nel altu Nalón y Aller coincidiendo cola másima intensidá y persistencia de les precipitaciones. Les temperatures en descensu bultable y l’aire de componente noroeste con dalguna racha moderada en zones altes de montaña ya en puntos del llitoral.
Mañana sábadu seguiremos con xarabatos intermitentes pero dirán perdiendo frecuencia ya intensidá durante la mañana, sobre too na fastera ocidental ya con intervalos de claros o abancios ente bastiazu ya bastiazu. Pela tarde quedará más seliquino pero’l fríu sedrá intensu. Les temperatures camudarán poco calteniéndose fríes durante tol día. La cota de nieve rondará de nuevu los 900m. y l’aire de componente noroeste amenorgará pa quedar sele en xeneral.
El domingu tovía podemos tener dalguna precipitación feble, sobre too na fastera más oriental con nubosidá abondosa na meta norte d’Asturies y dellos claros o abancios na sur con unes temperatures que van camudar poco, dexándonos un ambiente fríu ya ivernal. L’aire sedrá sele y de componente norte.
A partir del llunes un nuevu arreón de fríu va dir ganando terrén dende l’oriente y sobre too’l martes y miércoles el fríu pue ser mui intensu ya vendrá acompangáu de nubes ya precipitaciones febles pudiendo baxar la cota de nieve hasta los 200m pero tovía hai munchos detalles por definir polo que pequeños movimientos de los centros d’ación puen variar sustancialmente les previsiones, tar sollertes al parte del domingu ya llunes cuando podremos afinar dalgo más l’asuntu.
Estos díes tan siendo mui intensos nel seguimientu de los modelos meteorolóxicos, anque la situación de la prósmima selmana paez que pue ser mui fría pero seca, pola procedencia de la masa d’aire que vien de centrueuropa, pa más alantre siguen viéndose opciones de desaloxos importantes de fríu sobre Europa que mos puen llegar a nosotros.
Que paséis un bon vienres y que mos traigan muchos regalos los Reis Magos.
Semeya d’archivu del pueblu de Sotres del nuesu collaciu Meteobuenavista.
