Margarita Salas, un exemplu
pa les xeneraciones nueves
Sonia Avellaneda
Margarita Salas nació na parroquia de Caneiru, nel conceyu Valdés, nel añu 1938 y foi una de les cientifiques más importantes del mundu, algamando llogros bien importantes pa la medicina y la bioloxía.
Dempués de colar pa los Estaos Xuníos en 1964, Margarita fixo grandes avances na bioloxía molecular xunto col so home: Eladio Viñuela. Ente los sos llogros destaca’l del descubrimientu del ADN polimerasa, una proteína esencial pal desenvolvimientu de la inxeniería xenética, y que tien delles y mui importantes aplicaciones na biomedicina.
Integróse nes ciencies de la medicina de mui moza, al traviés de so pá, magar que per aquel entós yera un mundu nel que les muyeres nun taben bien vistes. A los 16 años marchara a estudiar a Madrid y, ellí, conoció a Severo Ochoa, nel añu 1958. El pá de Margarita, primu políticu y compañeru de la Residencia d’Estudiantes del científicu, convidáralu un día a comer. Mientres la xinta, Severo Ochoa propúnxo-yos acompañalu a una conferencia que debía dar al otru día n’Uviéu, y dambos aceptaron encantaos. La charra, que trataba sobre la so investigación, dexó estelada a Margarita y espertó la so fonda atracción pola bioquímica. Aínda nun tuviera esta asignatura na carrera, pero sabía que s’impartía en cuartu cursu y, al tresmiti-y a Severo Ochoa’l so interés, esti prometió-y que-y unviaría un llibru de bioquímica en llegando a Nueva York. Y asina lo fixo.
N’España, sicasí, sufrió bien de discriminaciones. Magar que dientro del so equipu, colos sos doctorandos, nunca tuvo nengún problema, de cara al esterior namás yera conocida como la muyer d’Eladio Viñuela, lo qu’a él-y resultaba terriblemente inxusto. D’esta miente, cola cuenta de que’l trabayu de Margarita fuera valoráu como merecía, en 1970 Eladio decidió entamar l’estudiu del virus de la peste porcina africana y la investigación del Phi29 quedó, puramente, so la dirección de Margarita. Nesti sen, pudo demostrar que yera quien a sacar alantre la investigación por sí mesma y convirtióse nuna científica con nome propiu, dexando a un llau la etiqueta de la muyer de.
Nos caberos años de la so vida foi profesora ad honorem nel centru de bioloxía molecular Severo Ochoa en Madrid y algamó dellos premios y reconocimientos poles sos investigaciones científiques.
En rellación a les muyeres na ciencia, Margarita Salas opinó en delles entrevistes, neto que munches otres científiques de la so xeneración, que’l métodu científicu corrixe’l sesgu de xéneru. Y consideraba qu’aquelles muyeres que valen y son perseverantes nel so trabayu, acaben siendo, col tiempu, reconocíes y valoraes como científiques, independientemente del so xéneru.
Otru llogru personal importante foi’l de ser la primer muyer asturiana n’ingresar na Academia Nacional de les Ciencies de los Estaos Xuníos. Nun podemos escaecer que Margarita formaba parte d’un mundu tradicionalmente venceyáu a los homes y, pese a ello, consiguió abrir camín pa delles otres muyeres. Sobre esto, llegó a dicir: «Nun futuru non demasiao llonxanu, yo pongo quince años, la muyer va ocupar nel mundu científicu’l llugar que-y correspuende acordies cola so capacidá y el so trabayu. Yo creo qu’ensin cuotes vamos llegar, lo que quiero ye que nun heba discriminación negativa pol fechu de ser muyer».
El so esfuerzu por facer d’esti un mundu más fácil y meyor pa toos y pa toes nun tien de ser escaecíu. Margarita Salas ye un referente de la investigación n’España, una investigación que cunta con profesionales d’altu nivel, pero que cada vez reciben menos sofitu y financiamientu públicu. El meyor homenaxe a Margarita, a toos ellos, sedría compensar la so dedicación facilitándo-yos les ferramientes necesaries pa desendolcar el so trabayu. Si nun tomamos les midíes necesaries pa facelo posible, quedaremos ensin futuru.
