IX Certame d’Acebachería

Un añu más presentóse na Villa l’únicu Certame d’Acebacheríaque se fae n’España, baxo la direición de María Pérez, maestra acebachera comprometida dafechu cola profesión, col material y col so posicionamientu como fósil xurásicu con carauterístiques úniques nel mundu, asemeyaes –pero estremaes– de los acebaches de Whitby y del sur de Turquía.

La visita a María ye una constante pa los que tamos esmolecíos pol futuru d’esti sector d’actividá artesanal tradicional d’un valor cultural ya económicu incalculable, pero, por ser de nuestro, desdexáu poles Alministraciones del Principáu. Les últimes noticies anuncien un ciertu enfotu na firma –por parte d’un científicu renomáu– de los estudios fechos hasta agora p’algamar un validamientu afayadizu de los mesmos y, en segundu llugar, consiguir una norma axeitada pa la reapertura d’una de les mines zarraes cuantayá pa un suministru curiosu del material. Dase por seguro que l’argayu del cantil na redolada del faru Tazones fizo despeñase al empar material fósil de perbona calidá, pero sacalo d’ellí paez enforma peligroso.