Publicado en Música, Premios

Xosé Ambás, premiu Serondaya de la Cultura 2022

Xoxé Ambás foi reconocíu pola xunta directiva de l’Asociación Cultural Serondaya, axuntada en Cenera, Mieres, por unanimidá col premiu Serondaya de la Cultura 2022. Una reconocencia otorgada polos sos trabayos rellacionaos con tradición oral y pola recuperación y l’espardimientu de les músiques populares».

L’Asociación Serondaya reafitase en que valoró especialmente la so trayectoria constante y enllargao nel tiempu como recopilador ya investigador de la tradición cultura asturiana, qu’inclúi la llingua propia de la nuesa tierra, según los sos arrogantes esfuerzos de divulgación».

 

«Voi llevar la mio pandereta a recibir el premiu Serondaya»

El músicu, natural de la población d’Ambás, nel conceyu de Grau, asegura habese sentíu «gratamente sosprendíu cola reconocencia, sobremanera considerando’l gran trabayu que lleven a cabu dende Serondaya, que siempres demostraron la so esmolición pola nuesa cultura tradicional. Ye bien prestosu que s’alcuerden de mi, siéntome bien arguyosu».

«La mio intención ye allegar a la entrega del premiu y, por si daquién dulda, voi llevar a la mio pandereta, como si fuera’l mio llaveru, va acompañame y casi seguro que va sonar porque va ver xente bien afayadiza», apuntó.

El primer contactu cola tradición oral asturiana para Xosé Antón Fernández Martínez, más conocíu como Xosé Ambás, sería la mesma tresmisión familiar de la mano de güeles y güelos, a finales de los años ochenta. Na actualidá sigue arrexuntando ya investigando dando gran importancia al espardimientu, recuperación y dinamización d’esti patrimoniu por aciu charres, publicaciones, talleres y al traviés d’apuestes como les ‘Nueches en danza’ y la recuperación de tradiciones, como ‘-yos Mazcares d’Hibiernu’, siempres coles mires de siguir dando a conocer la nuesa riqueza cultural y contribuyir asina a evitar la perda de les señes d’identidá del pueblu asturianu.

Trayectoria destacada

Un trabayu incansable que distintos galardones a lo llargo de la xeografía asturiana reconocen la so trayectoria y l’importancia del so trabayu, destacando’l de Gaiteru de la Hermandá de la Probe, de la Foz de Morcín, el Moscón d’Oru de Grau nel añu 2010, el premiu al sofitu y l’espardimientu de la música y tradiciones asturianes de la banda de gaites de L.lena Güestia en 2011, l’II Premiu Barbón de Faru en 2016 o’l Galardón Verdes Valles Ástures de la Fundación Marín Gutiérrez del añu 2018, ente otros.

La finalidá del Premiu Serondaya de la Cultura ye reconocer a les persones, grupos, asociaciones o instituciones que se dedicaren de manera constante, principal y sobresaliente al espardimientu y el desenvolvimientu de la cultura en cualesquier de les sos manifestaciones o en toes elles, y que los sos esfuerzos, trabayos, creaciones o iniciatives contribuyeren a la valoración y la comprensión de la cultura. El premiu consiste nuna escultura del artista mierense Llonguera y nun homenaxe públicu que, nesti casu, va celebrase’l día 21 d’ochobre, dientro de la programación de la Fiesta de la Serondaya.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *