Lo primeru vamos dir esplicando el encabezáu que pusimos y ye que tamos falando d’una entrada fría marítimu polar por mor de la procedencia y el recorríu de la masa d’aire. Vien direutamente dende zones polares a traviés del oceanu, conformando asina una masa d’aire fría y mui húmeda, anque al atravesar l’océanu y tar la temperatura del agua del mar un cachu más alta que’n tierra se recalienta dalgo en capes medies de l’atmósfera, polo que nun suelen traer nieve a cotes mui baxes pero si nevaes mui copioses nes montañes, por mor de la húmeda qu’apurre l’océanu.
A la escontra si tuvieremos falando d’una entrada fría polar continental, la masa d’aire sedría más fría en capes medies de l’atmósfera pudiendo nevar al nivel del mar pero les precipitaciones sedríen muncho más febles y ocasionales por mor d’atravesar el continente resecándose la masa d’aire a la vez que s’enfría.
Para que tengamos una nevada xeneralizada n’Asturies tien que dase una combinación d’ambes, qu’una entrada marítimu polar derive a polar continental, situación que se da, sobre too n’esta última década, mui rara vez.
Per otru lláu nos sumamos a eso de poner nome a too, y como esta entrada fría va petar de nieve les estaciones d’esquí la llamamos Chus Valgrande, en homenaxe al pioneru del esquí asturianu.
Vamos al lio, la situación meteorolóxica que se mos avecina va ser mui potente y complexa, vamos a tener una combinación de varios tipos de temporales, temporal de lluvia, temporal de vientu, temporal na mar y temporal de nieve, que darréu vamos desplicar.
Nel prósimu riscar la entrada d’un frente fríu va dir barriendo Asturies con precipitaciones abondoses a la par que van dir baxando les temperatures, surdiendo la nive n’alborada perriba de los 800m. Pela mañana van dir remitiendo les precipitacones y abriéndose dellos claros a partir del mediudía con un descensu nidiu de les temperatures. L’aire al pasu del frente pue soplar con fuercia, sobre too en zones de montaña ya en puntos del llitoral.
Pela nueche del domingu y tol día del llunes mos enchufa’l chorru polar de frente a traviés del atlánticu, recalentando la masa d’aire pero apurriéndonos muncha humedá, faciendo que sople l’aire gallegu con raches mui fuertes que puen algamar los 100km/h en zones espuestes de la costa y de la cordelera, dexanos mui mala mar , amás de venir acompangáu de precipitaciones fuertes y persistentes. Taríemos falando d’un temporal duru de lluvia y vientu pero nun de nieve porque la cota subirá a los 1600-1800m.
Durante la nueche del llunes al martes, previa la llegada de la masa d’aire marítimu polar va provocar una rolada de vientos de componente oeste-suroeste a noroeste, dexándonos raches mui fuertes de vientu que puen algamar los 120km/h en puntos del llitoral y zones de montaña que desuru van provocar números daños materiales, esperemos que quede ahí, cola caida d’árboles, tapies, teyes y demás coses que nun tengan un bon asentamientu. La lluvia seguirá persistente y la nieve solo aparecerá en cumbres.
Na alborada del martes yá entama entrar la masa fría, baxando les temperatures y la cota de nieve que va desplomase a los 500-700m durante la tarde con precipitaciones frecuentes y abondoses que puen venir acompangaes de truena y xarazu nel llitoral. L’aire va dir amenorgando pero entovía va soplar molestu.
Según va entrando la masa fría, durante’l riscar del miércoles, les precipitaciones van dir ganando intensidá y la nieve pue danos dalguna sorpresa, inclusu en zones baxes de los valles del interior asturianu, surdiendo n’alborada del miércoles perriba de los 200-300m, dalgo más alta nel llitoral y prellitoral que rondará los 400-500m. Esti día, siguen baxando bultablemente les temperatures con nevaes mui copioses que van dexanos prauticamente la totalidá de los puertos de montaña pesllaos pola nieve. Amás vamos tener muncho precuru nel restu d’Asturies, sobre too nel llitoral, poles tronaes y xarazaes con granizu que’n cuestión de minutos puen dexar cualquier carretera imprauticable.
Mirar ,la masa d’aire tan fría que se prevé, s’espera que tengamos enrriba nuesu una temperatura n’altor a 500hpa. que’n esti casu rondará tan solu, por mor de los baxos xeopotenciales, los 5.200- 5.300m, de -35ºC, col mar Cantábricu con una temperatura superior a lo normal, alrodiu de los 14-15ºC van producise un caldu de cultivu perfeutu pa que se desendolquen les nubes verticalmente y mos apurran xarabatos de calter tormentosu con xarazu y granizu de gran tamañu nel llitoral y prellitoral y nevaes persistentes y mui copioses na cordelera con desplomes de la cota de nieve hasta lo más fonderu de los valles.
Facía munchos años que nun se daben estes circustancies, tariemos falando d’un temporal duru de nieve nes montañes asturianes.
Esta situación pue estendese durante gran parte del xueves anque la masa fría yá va retirándose hacía l’este, perdiendo fuelle los xarabatos y subiendo dalgo la cota de nieve.
Bono, esti ye’l nuesu pronósticu, yá sabéis qu’esto nun ye una ciencia esacta y amás caún lo interpretamos a la nuesa manera, acertaremos más o menos pero nun podemos de dexar de pediros muncho precuru, la situación pue ser potencialmente peligrosa nes carreteres y cais, montañes y la mar, si nun se tomen les medies necesaries podemos llevar dalgún susto, nun ye dalgo que nunca vieremos pero la falta de costume pue facer que baxemos la guardia.
