Publicado en Entrevistes

Entrevista a Xosé Antón Glez. Riaño

Xosé Antón: «Los asturianos tenemos qu’enfotanos más en nós mesmos» 

Xosé Antón González Riaño (Viella, Siero 1956) ye Doctor en Pedagoxía pola Universidá d’Uviéu (1993) y anguaño ostenta’l cargu de Presidente de l’Academia de la Llingua Asturiana dende 2017. Tamién ye Diplomáu en Maxisteriu y Llicenciáu en Filosofía y Ciencies de la Educación pola mesma Universidá. Tien una dilatada trayectoria nel ámbitu docente, dende profesor d’Educación Primaria en distintos centros educativos hasta contribuyir al Área de Didáctica de la Llingua y la Lliteratura de la Universidá d’Uviéu agora como Profesor Titular.

En 2005 el Ministeriu d’Educación y Ciencia d’España concedió-y, xuntu cola Dra. María Louzao, el Premiu Nacional d’Investigación Educativa. En 2019 reconocióse-y el so llabor col Premios Urogallo na so categoría de Llingua Asturiana.

Un llugar pa perdese una fin de selmana…

-La Bustariega, un pueblu de Somiedu. Nun ye’l míu, pero ye sorprendentemente guapu. La so rodiada, el paisaxe, la estructura de les quintanes y les cases… llamen l’atención. Por cierto, ellí nun hai chigres.

Un llugar pa vivir…

-Cualquiera d’Asturies. Por exemplu, el branu de Xixón, l’iviernu d’Uviéu o la seronda de Robléu

Un platu…

-Pues un cocíu marineru de patates con tiñosu, amusueles y pimientinos

Un postre…

-Borrachinos. Hai que reivindicar esti postre del occidente d’Asturies. Ye bien cenciellu: güevu, migues de pan y vinu blanco

Una playa pa pasar el día…

-A mí gústame muncho la de Ribeseya. El so paséu y l’entornu son d’una guapura esceicional

Un pueblín que nun podemos dexar de ver…

-La Peral, ye un pueblu vaqueiru que se caltién mui bien y con munches cabañes de teitu. Hai qu’aprovechar agora porque en cuantes llegue l’iviernu queda cuasimente ensin vecinos pola ñeve.

Un chigre pa tomar unos culinos…

-El Ferroviario. Ye una sidrería tradicional d’Uviéu. Agora ta anovada y llévenla unos rapazos qu’entienden perbién el negociu

Un parque natural pa visitar…

-Home, yá sé que siempres tiro pa casa, pero nun hai nada n’Asturies como Somiedu.

Una fiesta a la que nun faltar…

-Yo de mozu enxamás me perdía El Carmín. Yá se que nun ye lo mesmo, pero son les mios alcordances. ¡Qué bien lo tengo pasao ellí! (y eso que diba dempués de terminar la xornada del día andando a la yerba).

Un muséu pa recomendar…

-Pues el Muséu del Pueblu d’Asturies en Xixón. Paezme especialmente bien trabayáu dende’l puntu de vista de la cultura tradicional.

Un momentu de la hestoria d’Asturies que te prestaría vivir…

-Espero que se dea bien llueu: la declaración de la oficialidá de la llingua asturiana. 

Un baille pa pasalo bien…

-Yo conozo bien Cangas del Narcea porque trabayé ellí. Deprendí’l «son d’arriba», ye un baille d’un especial simbolismu.

Una pallabra n’asturianu que te preste…

-Enfotu. Ye una pallabra mui positiva qu’indica confianza, determín, aición… Los asturianos tenemos qu’enfotanos más en nós mesmos

Una tradición que nun pue perdese…

-Toles que tienen que ver cola solidaridá y la collaboración ente la xente. Yo tovía participo en sextaferies y andeches

Una espresión n’asturianu que te preste…

–Si la ficisteis en Payares, pagaréisla en Campumanes. Fai referencia a un fechu históricu, pero dexo la so interpretación a la imaxinación de la xente

Autor:

Maestra de Llingua Asturiana Colexu Carmen Ruiz-Tilve - Uviéu