Esperamos otra xornada calorosa n’Asturies. Les temperatures máximes van xubir en tola metá sur hasta 3 ºC más que’l xueves, ya inclusive hasta 4 ºC nel suroccidente. Tamién podríen xubir les máximes nel estremu más oriental de la rexón. Nel restu van caltenese polo que volveremos tener un día con valores que van superar los 30 ºC nes poblaciones más caloroses del Principáu. En cuanto al estáu de los cielos, vamos amanecer nubes baxes na mariña y otres zones del norte d’Asturies, pero esta nubosidá va estenase col pasu de les hores y van abrise grandes claros polo xeneral. Pela tarde va apaecer nubosidá d’evolución que podría acabar dexando bastios d’orixe tormentosu y acompañaos de xarazo.
L’Axencia Estatal de Meteoroloxía va activar a partir de les 18 hores l’avisu mariellu en tola Comunidá Autónoma pola posibilidá de nubes, fuertes bastios de forma local y xarazo superior a 2 centímetros. Los vientos van ser fluexos polo xeneral con delles raches daqué más significatives asociaes a les nubes nel momentu que puedan producise. El sábadu vamos tener cielos bien nublos polo xeneral con un descensu térmicu notable polo que l’ambiente nada va tener que ver col de l’anterior xornada o’l d’estos últimos díes.
