L’ayerán Iván gonzález presentó’l pasáu llunes el so nuevu modelu de gaita asturiana nel conservatoriu de Xixón. Trátase d’una gaita diseñada pa reducir l’elevaú nivel de presión sonora que caracteriza a la gaita asturiana, col oxetivu de facilitar la so presencia n’otros estilos y el so empaste colos demás instrumentos. Al estilu de les small pipes, pero orientada hacia la sonoridá y la tímbrica de les gaites asturianes, esti instrumentu cunta cola mesma dixitación de la gaita asturiana, siendo’l cambiu más notable la presión que se tien qu’aplicar al soplar y apretar el fuelle. L’artesanu comentó que va fabricala en varies tonalidaes y con posibilidá d’incorporar ronquín, llaves, etc.
Dos años de trabayu tán detrás d’esti modelu col que’l gaiteru y constructor algamó baxar hasta los 85 dB, alloñándose abondo de los 110 que ronden les gaites convencionales. Amás de ser un diseñu que permite practicar en casa con un instrumentu acústicu, tamién ye propiciu a integrase nes sesiones de música folk.
Na presentación, pudo sentise la gaita xunto a varios instrumentos. Primero, el propiu Iván xunto a Dani Álvarez tocaron delles pieces a dúu con esti modelu, y dempués, en pareya de gaita y flauta. Lluéu, José Luis Díaz al bouzouki acompañó tocando otra pieza xunto a la gaita, tamién n’acústicu. El resultáu ye un equilibriu de volúmenes mui satisfactoriu, sintiéndose tolos detalles del acompañamientu tanto de la flauta como del bouzouki. Como comentó na presentación el gaiteru Flavio Benito (mayestru de gaita nel centru), esta anovación abre les puertes a trabayar nuevos repertorios, sobre manera no tocante a la formación reglada nel conservatoriu, onde les asignatures de conxuntu o música de cámara requieren instrumentos con volúmenes asemeyaos.
