Publicado en Día de...

Día Mundial del celebru

/

El 22 de xunetu dende l’añu 2014 celébrase’l Día Mundial del Celebru, fecha instaurada pola Federación Mundial de Neuroloxía (WFN) y que tien como propósitu caltener la salú mental. Recordamos lo determinante que ye esti órganu para la salú global del individuu. Les
enfermedaes cerebrales son la primer causa de discapacidá a nivel mundial, apurre la principal carga global d’enfermedá y ye la segunda causa de mortalidá.

Ye unu de los órganos vitales más complexu que controla les actividaes cognitives y les reacciones del organismu. Magar constitúi’l 2% del pesu corporal, consume’l 20% de la enerxía y osíxenu. En xunto alluga 86.000 millones de neurones y cada una d’elles establecer en promediu 10.000 contactos sinápticos con otres, tresportando la información a una velocidá d’alredor de 350 kilómetros per hora. Nos diestros la funcionalidá del lóbulu esquierdu ta acomuñada col analís, la lóxica, les matemátiques y el llinguaxe, ente que’l derechu desenvuelve la creatividá, la intuición, los sentimientos, la imaxinación y les artes. Hasta va poques décades considerose como de calter eminentemente racional, anque na actualidá la so funcionalidá depende tantu a más de les emociones.

  • Autor Mario Vestfrid  (Presidente de FUNDANYCC), del llibru “Dialogando cola mente Una visión dende la neurociencia”.

  • Ye fundamental curiar nuesa salú cerebral al traviés d’acciones o actividaes
  • A partir de los 25 años empiezase a perder volume cerebral

Dempués de dellos meses viviendo una situación ensin precedentes marcada pola incertidume, munches persones tán esperimentando una cierta sobrecarga mental. Anque estos episodios nun tán consideraos como un factor de riesgu a nivel neurolóxicu, al llargu plazu sí podríen llegar a tener un impactu negativu. Ello ye que esisten dellos estudios que demuestren que los pensamientos negativos y l´estrés crónicu tán íntimamente rellacionaos col cayente cognitivu.

Estos datos ponen de manifiestu que, agora más que nunca, ye fundamental curiar nuesa salú cerebral al traviés d’acciones o actividaes qu’ayuden a exercitar la mente y asina ganar mayor calidá de vida al llargu plazu.

Acciones tan simples como potenciar les relaciones sociales y afeutives, practicar xuegos mentales, realizar exercicios de memorización, siguir adquiriendo nueves conocencies, desconectar de xemes en cuando, trabayar la concentración o apostar por alimentos qu’exerzan un papel protector para la salú cerebral pueden contribuyir de manera significativa a retrasar, ya inclusive prevenir, el deterioru cognitivu asociáu al avieyamientu.

1. Potenciar les relaciones sociales y afeutives
Les relaciones sociales son bien beneficioses para la salú cerebral, yá que son una forma d’arriquecimientu intelectual ya impliquen retos cognitivos por aciu la conversación con otres persones, teniendo qu’atender a qué nos diz l’interlocutor y a recordar información relevante.

2. Desconectar de xemes en cuando
D’esta miente, vamos activar la denominada ‘rede neuronal por defectu’, una parte del celebru que resulta fundamental para caltener la memoria al cien per cien. Para aquellos a los que-yos resulte complicáu relaxase, encamiéntase apostar pola práctica regular de meditación, exercicios de relaxación o yoga.

3. Exercitar l’axilidá al traviés de xuegos mentales
Ye una bona manera de potenciar el pensamientu lóxicu, suponen un refuerzu extra para l´estimulación cerebral, y amás, presten y entretienen. Tou esto favorez el desenvolvimientu de nueves interconexiones neuronales y exerz un papel protector frente al deterioru cognitivu. Son munches les actividaes que pueden ponese en práctica: axedrez, crucigrames, sudokus, xuegos d’entrugues y respuestes, sopes de lletres, xuegos de cartes, etc.

4. Realizar exercicios de memorización
Poniendo en práctica esi tipu d’actividaes podemos exercitar el celebru y potenciar la capacidá de retención d’información. Daqué tan simple como aprendese unu cantar, un númberu de teléfonu, la llista de la compra o una poesía ye un bon puntu de partida.

5. Adquirir nueves conocencies
L’aprendizaxe considérase como un aspeutu clave de la plasticidá neuronal, entendida ésta como la capacidá que tien el celebru para formar nueves conexones nervioses y caltener la mente axilosa. Apuntase a un taller d’arte, aprender a cocinar o a baillar, o empecipiar un cursu d’idiomes son dalgunes de les actividaes que pueden llevase a cabu. Nesti sentíu, tamién resulta bien útil camudar de vezos o realizalos de forma distinta (utilizar la manzorga para ciertes xeres, camudar el percorríu para dir al trabayu, dir a otru supermercáu).

6. Trabayar la concentración
Para potenciar inda más la memorización y l’aprendizaxe, encamiéntase trabayar tamién la concentración. Hai munches maneres de fomentala. Una d’elles ye la denominada técnica Pomodoro, que combina periodos curtios de concentración con descansos intermitentes. Otra práctica bien útil ye’l mindfulness, qu’ayuda a llograr un estáu d’atención centráu nun pensamientu o sentimientu.

7. Curiar el descansu

Tal que indica la Sociedá Española de Neuroloxía, esfrutar d’un descansu nocherniegu calidable protexe la salú cerebral, yá que mientres el suañu restauren funciones rellacionaes col aprendizaxe, la memoria o l’estáu d’ánimu. Según estos espertos, los trestornos del suañu estropien les estructures del celebru, causen déficits cognitivos y aumenten la incidencia de trestornos rellacionaos col riesgu vascular.

8. Realizar una actividá física de forma regular
Siguir un estilu de vida activu qu’incluya la práctica regular d’exerciciu aumenta la frecuencia cardiaca, lo que dexa bombiar más osíxenu al celebru y facilita la lliberación corporal de miles d’hormones, creando una redolada aparente para la proliferación de célules cerebrales.

9. Apostar por alimentos qu’exerzan un papel protector frente al avieyamientu cerebral
L’alimentación ye unu de los pocos factores de riesgu que podemos controlar p’ameyorar nuesa salú cerebral. Anque, polo xeneral, lo recomendable para fortalecer el celebru ye apostar por una dieta equilibrada, rica en vexetales, vitamines, minerales y antiosidantes, hai diversos alimentos especialmente indicaos pa curiar d’esti órganu: pexe azul, cítricos, verduras, cacáu puru, canela, aguacates o nueces. Asina mesmu, tamién ye importante evitar l’escesu de sal, azucre y grases trans.

Amás, va ser especialmente importante evitar el consumu d’alcohol y tabacu, yá de por sí descomanadamente perxudiciales pa la salú, cuidao que interfieren directamente na función neuronal, y suponen unu de los principales factores de riesgu pal desenvolvimientu d’enfermedaes cerebrovasculares.

A lo último, ye fundamental caltener la presión arterial en unos niveles afechos, sobremanera naquellos grupos de mayor edá. Tamién ye importante siguir un estilu de vida saludable que contribuya a prevenir l’apaición d’enfermedaes como hipercolesterolemia, diabetes u obesidá.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *