Publicado en Curiosidaes, NATURA

Unos neños afayen un pingüín xigante fosilizáu

Simone Giovanardi

Cuando en 2006 los nuevos miembros d’un club de naturaleza de Nueva Zelanda salieron d’escursión a la caza de fósiles, nun sabíen qu’acabaríen afayando una nueva especie…

Un trabayu publicáu na revista Journal of Vertebrate Paleontology  (web) confirma que los restos fósiles d’un pingüín xigante que fueron atopaos por un grupu d’escolares en 2006 pertenecen a una especie hasta agora desconocida. Los neños fixeron esti estelante afayu n’una salida de campu col Hamilton Junior Naturalist Club en Kawhia Harbour (Nueva Zelanda).

Los restos fueron analizaos por un equipu d’investigadores de la Universidá Massey (Nueva Zelanda) y del Muséu Bruce (Connecticut, Estaos Xuníos) por aciu escanio 3D, una técnica que-yos dexa comparar dempués el fósil con versiones dixitales de güesos de too el mundu, según llograr unu retruque impresu en 3D del mesmu.

Les resultancies indiquen que’l fósil tien ente 27,3 y 34,6 millones d’años, xuna dómina na que gran parte de la rexón onde foi atopáu atopábase somorguiada so l’agua. “El pingüín ye similar a los Kairuku, otra especie de pingüinos xigantes que fueron afayaos per primer vegada n’Otago, pero tien les pates muncho más llargues, lo que-y valió’l nome de waewaeroa (‘pates llargues’ en maorina). Quiciabes midiría 1,4 metros d’altor, y estes pates podríen influyir na rapidez a la que podía nadar o la fondura a la que podía somorguiase”, esplicó Daniel Thomas, profesor titular de Zooloxía de la Facultá de Ciencies Naturales y Computacionales de Massey.

/

/

Un pingüín emblemáticu: Kairuku

/

Kairuku waewaeroa ye emblemáticu por munches razones. El pingüín fósil recuérdanos que compartimos Zealandia, l’antiguu continente somorguiáu, con llinaxes d’animales increíbles que se remonten bien tras nel tiempu. Amás, la forma na que foi afayáu recuérdanos la importancia d’afalar a les xeneraciones futures pa convertise en guardianes de la naturaleza”.

 

Los neños que fixeron esti increíble afayu col so club naturalista yá nun son tan pequenos, y munchos recuerden con emoción el descubrimientu: “Ye increíble ver que daqué qu’atopamos cuando yéramos neños va tantos años ta contribuyendo a l’academia actual, ¡y amás ye xuna nueva especie!”, recuerda unu d’ellos. “La esistencia de pingüinos xigantes en Nueva Zelanda ye poco conocida, y ye bonu saber que la comunidá científica sigui estudiándolos y aprendiendo más sobro ellos”.

“Siempres ye emocionante atopar un fósil, porque pienses na cantidá de tiempu que permaneció escondíu, zarráu nuna roca”, cavilga Taly Matthews, miembru dende va muncho tiempu del Hamilton Junior Naturalist Club, y que trabaya pal Departamentu de Caltenimientu en Taranaki. Sicasí, atopar un fósil de pingüín xigante ta n’otru nivel. A midida que afayen más, vamos poder enllenar más llagunes na so hestoria. Ye bien emocionante”.

Referencia: Simone Giovanardi, Daniel T. Ksepka & Daniel B. Thomas (2021) A giant Oligocene fossil penguin from the North Island of New Zealand, Journal of Vertebrate Paleontology, DOI: 10.1080/02724634.2021.1953047

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *