- Fonte: La Voz de Asturias /
De graneru/tenada a complementu d’una vivienda o negociu: les midíes del plan que regula nuevos usos para los horros.
«L’horru nun ye un fósil, inda ta vivu y agora podrá afaese a les necesidaes actuales», valoren na Asociación d’Amigos del Horru Asturianu, na que destaquen tamién los beneficios de qu’exemplares «que son casi pieces de muséu» pasen a ser BIC: Bienes d’interés Cultural.
N’Asturies nengún horru ye bien d’interés cultural (BIC), pero en principiu podríen ser dellos cientos los que, por ser auténtiques xoyes del patrimoniu etnográficu, pasen a tener esta protección que, según el primer Plan del Horru presentáu apocayá pola Conseyería de Cultura, Política Llingüística y Turismu, va suponer que los sos propietarios van recibir ayudes específiques de l’Alministración para’l so caltenimientu. Ye una de les midíes d’un plan col que se propón modificar el reglamentu de desenvolvimientu de la Llei de Patrimoniu Cultural para incentivar el caltenimientu d’horros, paneres y cabazos n’Asturies, que tamién va regular nuevos usos, amás d’almacén o tenada, para los exemplares que nun sían consideraos BIC.
«L’horru nun ye un fósil. Inda ta vivu, nun morrió, y agora podrá afaese a les necesidaes de los tiempos presentes», valora l’arqueólogu Fernando Mora, que pertenez a l’Asociación d’Amigos del Horru Asturianu y que s’amuesa convencíu de qu’esti Plan del Horru, una vegada qu’empiece a aplicase, va tener ensin dulda muncha acoyida. «Si l’horru cumple les condiciones, va podése-y dar otra oportunidá, restaurándolo afechiscamente y dándo-y un usu más actual. Hai xente que sigue utilizándolos como almacén, pero hai enforma que nun almacena nin el granu nin la comida y qu’agora-y van a poder dar otru usu», diz, señalando qu’a diariu na asociación reciben consultes precisamente sobro esti asuntu.
Asina, los horros y paneres van poder ser complementu d’una vivienda o negociu, yá sía d’hostelería o hotelería, d’información turística o cultural o puestos de vienta por casu de productos asturianos. Pero solu como complementu de la edificación principal. «Un horru nun va poder ser xuna vivienda exenta nunca», matiza Mora, que recuerda qu’estes construcciones siempres tuvieron amestaes a viviendes y que, ello ye que son bien pocos los horros exentos qu’esisten. «Si hai ye porque se movieron por devenires de la vida moderna, pero hasta los horros qu’hai nes brañes tán al llau de la cabana de la braña. Tamién les paneres que tán nel centru de les places tienen la so casa enfrente. Tolos horros y les paneres tán siempres venceyaos a una casa porque si nun pierden el so sentíu tradicional».
