Publicado en Red Normalización Llingüística

Propuesta de decretu pol que se crea y regula la R. N. Llingüística.

Recordamos qu’hasta’l 18 de marzu pueden facese aportaciones a la Propuesta de decretu pol que se crea y regula la Rede de Normalización Llingüística.
La Rede de Normalización Llingüística (REDE), entidá qu’axunta y articula a los Servicios de Normalización Llingüística que trabayen a lo llargo del territoriu asturianu na promoción del asturianu y el gallego-asturianu nos conceyos y mancomunidaes, va ser reconocida y regulada oficialmente al traviés d’un decretu.

Con esta midida quier reforciase’l papel d’estos servicios, que yá vienen trabayando a comuña cuasimente dende la so apaición na primer década d’esti sieglu, anque de manera non reglamentada.
Según la propuesta de decretu, la REDE «ta llamada a desempeñar un papel fundamental na regulación territorial de la política llingüística, na creación de servicios normalizadores nuevos, nel caltenimientu de los que yá tán funcionando y na coordinación y desenvolvimientu de l’actividá de toos ellos (…)».

¿Qué se pretende solucionar?

El Gobiernu d’Asturies tien la intención de reforzar el papel de los Servicios de Normalización Llingüística (SNL) surdíos a partir del 2001 en conceyos y mancomunidaes, amás de n’otres instituciones o entes del Principáu. Como serviciu públicu que dan, quier dir ameyorándose la so dotación económica y de personal na midida en que lo permitan los presupuestos, comprometiéndose a facer un mayor esfuerciu de coordinación ente los servicios, d’estabilización, desenvolvimientu y medría, de manera que puedan cumplir col so cometíu dinamizador de la política llingüística que se promueve.

La REDE ta llamada a desempeñar un papel fundamental na regulación territorial de la política llingüística, na creación de servicios normalizadores nuevos, nel caltenimientu de los que yá tán funcionando y na coordinación y desenvolvimientu de l’actividá de toos ellos, porque que va dexar facer una xestión más eficaz y eficiente nos dos niveles de trabayu que se proponen: per una parte nel de la responsabilidá política, al traviés de la participación de los cargos electos, y per otra nel de la Comisión Técnica. Amuésase asina la Rede de Normalización Llingüística (REDE) como un instrumentu que ye la cuenta pa llevar a cabu la cooperación económica, técnica y alministrativa nel desenvolvimientu d’una política llingüística afayadiza que fomente con eficacia y cercanía la protección, l’usu y la promoción de les llingües propies.

OXETIVOS:

Dar carta de naturaleza a la REDE, un instrumentu que yá funciona de manera non reglamentada, como plataforma collaborativa de trabayu y de comunicación interna ente’l personal técnico de los SNL. Esti decretu, un pasu previu al establecimientu d’un futuru consorciu de política llingüística, crea esa REDE y regula la so composición, la so organización y el so funcionamientu. Cúntase tamién, de cara a un futuru bien averáu, cola incorporación d’aquelles entidaes privaes ensin ánimu d’arriquecimientu (cámares de comerciu, fundaciones, asociaciones empresariales, de consumidores, conseyos reguladores, etc.) que lo soliciten.


Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *