Publicado en Día de...

XXXI Día de la Canción Asturiana

Siero acueye esti domingu’l XXXI Día de la Canción Asturiana

L’Asociación d’Intérpretes de la Canción Asturiana (AICA) entama esti domingu 3 d’ochobre, a les 19:00 hores, nel Teatru Auditoriu de La Pola (Siero), el XXXI Día de la Canción Asturiana. A esto hai qu’añader la conmemoración de los venticinco años dende que l’asociación vien desenvolviendo actividaes nesi conceyu, cola ayuda de la Fundación Municipal de Cultura.

Una decena de voces perconocíes nel mundu de la tonada van participar nesti alcuentru, ente elles: Che de Cabaños, Lorena Corripio, Mariluz Cristóbal Caunedo, Ismael Tomás, Liliana Castañón o José Manuel Robledo. Contando tamién cola presencia de gaiteros (Víctor Álvarez, Álvaro Álvarez y Elena Martínez) y tamboriteros (Víctor Álvarez y Isabel Díaz), amás de teatru costumista (La Páxara Pinta) y monólogu (Pin de la Cotolla).

Tampoco van faltar los homenaxes, como yá ye vezu añu tres añu nel Día de la Canción Asturiana, nesta ocasión los protagonistes van ser la cantadora Chucha de Nembra (Jesusa Fernández), Fernando Ruíz (presentador y director a lo llargo de bien d’años del Concursu de Canción Asturiana d’El Comercio) y, por último, la FMC de Siero (por toos esos años de collaboración con AICA). Tamién va haber tiempu pa l’alcordanza, faciendo un reconocimientu a Vital Noval, cantador que compartió en munches ocasiones escenariu con otros compañeros y compañeres d’AICA, que finaba hai dos años y daquella nun pudo facése-y l’homenaxe previstu.

La entrada a esti XXXI Día de la Canción Asturiana ye llibre hasta completar l’aforu, pudiendo recoyer les entraes na Casa de la Cultura, de llunes a vienres, de 17:00 a 21:00 hores, y el sábadu, de 12:00 a 13:00 hores.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *