Publicado en TIEMPU

Estáu del tiempu: llunes 4 de xineru

Alborecemos con xarabatos intermitentes que son más intensos y persistentes nos valles del interior, onde nieva copiosamente perriba de los 300m, les temperatures tan al rodiu de 1-2ºC y nel puirtu Payares rexistrán -5ºC, onde se fae l’usu obligatoriu de cadenes o neumáticos d’iviernu. Muncho precuru nel restu de carreteres del interior porque la nieve ta complicando muncho la circulación, hai una montonera puirtos de montaña peslláos d’esta nueche.
Güei tendremos xarabatos frecuentes que van venir acompangáos de truena ya xarazu nel llitoral y van ser de nieve perriba de los 200-300m nel interior, subiendo la cota nes hores centrales del día a los 300-400m. L’aire de componente norte-noroeste sele en xeneral y les temperatures en descensu.

Mañana martes va dir perdiendo fuelle y frecuencia los xarabatos pela mañana, la nieve surdirá perriba de los 200-300m durante’l riscar, pa dir subiendo hasta los 400-500m al mediudía pero yá sin malpenes precipitaciones. Al atapecer van dir ganando los claros a les nubes y n’antes qu’acabe’l día va xelar na mayor parte d’Asturies. L’aire del nordés sele en xeneral y les temperatures camudarán poco con un ambiente mui fríu.
El día de Reis alboreceremos con escasa nubosidá y xelaes xeneralizaes hasta nel llitoral, a pesar de la llume del sol l’ambiente va seguir mui fríu, con temperatures másimes que malpenes superarán los 5ºC, esti día muncho cuidadín coles plaques de xelu, sobre too onde te’l suelu neváu, en delles zones, onde los rayinos de sol nun entren en tol día, van quedar con másimes negatives. L’aire va ser del nordés sele en xeneral.
El xueves va dir ganando protagonismu l’aire nordés, enfriando entovía más Asturies y apurriéndonos nubosidá de retención, principalmente nos cordales costeros, sobre too del oriente, onde nun se descarta dalguna precipitación feble en forma de nieve.
El vienres vamos seguir baxo la influencia del vientu nordés con precipitaciones febles que va ser de nieve perriba de los 200m, pa la fin de selmana entovía hai munches duldes, según se posicione la borrasca atlántica que va pasar pol sur penínsular, si se tira al Mediterranéu mos inyectará fríu européu y seguiremos baxo’l fluxo del nordés con precipitaciones y nevaes perriba de los 200m, si s’atasca nel oeste peninsular barrerá’l fríu y subirán les temperatures, pero esto ya lu diremos viendo.

Autor:

Maestra de Llingua Asturiana Colexu Carmen Ruiz-Tilve - Uviéu