Dende hai yá dalgún tiempu vien produciéndose na escena de la música del país una renovación de la mesma dende parámetros abiertamente contemporáneos y modernos pero, al empar, sobre una base tradicional que-y da orixinalidá y aporta l’elementu identitariu. Estes propuestes nueves muévense nel universu de los soníos electrónicos, les programaciones y los samples (muestres sonores), a lo qu’amiesten elementos ritmicos, melódicos o vocales que, xeneralmente, rescaten de la tradición musical o del folk llariegu. Una corriente qu’agora alcuentra ecu n’Asturies, pero que nel restu del Arcu Atlánticu lleva décades presente, ufiertando verdaderes xoyes d’esti alcuentru ente la modernidá más absoluta y la tradición más ancestral.
Antecedentes
Según escribe Derek B. Scott (Caderalgu de Musicoloxía Crítica y Director de la Escuela de Música de la Universidá de Leeds n’Inglaterra), na so obra The Ashgate Research Companion to Popular Musicology (2009), folktrónica sería: «un términu xeneral pa tou tipu d’artistes que combinen ritmos mecánicos de baille con elementos de rock acústicu o folk».
Si falamos d’esperiencies d’axuntar electrónica y folk habría que facer alcordanza d’una banda escocesa de folk-rock llamada New Celeste, creada en Glasgow en 1975. Practicantes d’un soníu de calter electro-acústicu, nel añu 1997 publicaben un álbum tituláu It’s a New Day, nel qu’incluiríen pieces como «Stumlin’ & Stottin’» o «Polkadotty» que son bona muestra de la so esperimentación con ambientes de xeitu electrónicu. Ente los pioneros d’esta tendencia bautizada tamién como Electrotrad o Ethnotrónica, habría que nomar a bandes como los tamién escoceses Peatbog Fearies. Fundaos na isla de Skye en 1991, la so música acueye infuyencies de la música tradicional, el folk, el rock y el jazz, pero colos años foron dando cada vez mayor importancia a la electrónica y los ritmos programaos; el resultáu ye escitante, con momentos ambient o otros más dance, pero cola música escocesa siempre presente. Discos como’l tituláu Faerie Stories (2000) puede ser una mui bona manera d’adientrase nel universu sonoru d’estos escoceses inclasificables. Una figura imprescindible pa conocer estes conexones primeres ente electrónica y tradición ye’l de la norteamericana d’orixe escocés Talitha MacKenzie; con una formación musical y académica amplísima publicaba un discu tituláu Sòlas (1993), onde fusionaba canciones tradicionales gaéliques -fundamentalmente de la llamada Mouth Music escocesa: Puirt à beul- con una base electrónica y ritmos programaos. Como anécdota contar qu’a principios d’aquella década visitaba Asturies, ufiertando un conciertu nel Teatru Campoamor (Uviéu) al qu’asistiríemos unes cuarenta persones que salimos sorprendíes por aquella «nueva» música celta (entós l’interés del mundu folk asturianu taba centráu cásique esclusivamente nel soníu acústicu).
Fundamental pa la configuración d’esti estilu sería la banda Afro Celt Sound System, fundada en 1991 sobre una idea del productor y guitarrista inglés Simon Emmerson, qu’axuntó a músicos irlandeses y escoceses con colegues africanos a ver qué pasaba… L’aniciu de too ello surde cuando Emerson taba produciendo un discu del senegalés Baaba Mal y decatóse de l’asemeyanza ente una melodía africana y un aire tradicional irlandés. Un tiempu depués, el gaiteru irlandés Davy Spillane cuénta-y que los celtes vivíen n’Africa y India enantes de venir a Europa. Dexando al marxe la veracidá o non d’esta teoría, el casu ye qu’Emmerson quedó intrigáu poles afinidaes que descubriera en Senegal y quixo esperimentar con ello. El resultáu nun pudo ser más orixinal y sorprendente, mezclando amañosamente la electrónica col bodhrán irlandés y el tama africanu na percusión, mientres la uilleann pipe (gaita irlandesa) y la kora senegalesa (especie d’arpa) encárguense de les melodíes; con un repertoriu qu’inclúi pieces d’hai 600 años entemecíes col jungle y el house.
Pero si falamos de verdaderos «constructores» d’esti soníu hai que nomar irremediablemente al gaiteru/violinista Martyn Bennett, nacíu en Terranova (Canadá), anque de familia y cultura escocesa. Treslladáu de rapaz al país de los sos ancestros ingresa nel conservatoriu pero aquello nun-y presta: «Nestos sitios nunca se preocupen por disfrutar de la música», llegaría a dicir. Principia a interesase poles nueves tecnoloxíes y queda prendíu d’elles nel aspectu musical, d’esta manera avézase a los sintetizadores y secuenciadores y descubre’l potencial enorme que supón fusionar melodíes seculares de calter tradicional con ritmos dance, house o hip hop. La so carrera en solitario principia tocando la gaita o’l violín acompañáu d’un ordenador onde suenen ritmos programaos; por cuenta d’ello ye conocíu como Techno-Piper (El Gaiteru Tecno). Los sos primeros discos respuenden al enfotu de busca sonora y esperimentación, causando sorpresa y almiración ente públicu y crítica, mientres que nos últimos muéstrase más reflexivu, xirando alredor de la tradición y la tresmisión musical d’unes xeneraciones a otres. Ente ellos, destaca’l tituláu Glen Lyon, grabáu a comuña con so madre, qu’inclúi un garrapiellu de melodíes tradicionales que traten sobre aspectos estremaos de la vida cotidiana: dende la nacencia al trabayu, l’amor, la felicidá, la muerte o lo sobrenatural; nesti mesmu discu tamién diba rescatar la voz del so taragüelu, sacada d’un cilindru de cera de 1910. Desgraciadamente, diba morrer con namás 33 años, pero sentaría les bases más sólides d’esti estilu amiestu d’electrónica y tradición y publicaría dellos de los sos álbumes de referencia.
Actualidá
Anguaño la folktrónica ta más qu’afitada nel panorama musical a nivel global, abarcando músiques d’orixe tradicional de prácticamente tolos continentes. Nel casu concretu de los soníos célticos son bien numberosos los exemplos de formaciones, esperiencies y proyectos que busquen víes nueves d’espresión pa les músiques identitaries de los finisterres atlánticos.
Bretaña sumóse con fuercia y muncha creatividá a esta corriente, con bandes como Añjel I.K. (el so primer discu titulábase mui significativamente Attitude Trad et Grooves Explosifs, onde’l cantu tradicional bretón -Kan ha diskan- entemezse colos ritmos secuenciaos), Plantec (tríu cola bombarda, la guitarra y los ordenadores como base musical) o Hiks (el títulu del so primer discu yá lo diz too: Drum’n Breizh, música tradicional bretona, techno y hip hop a comuña). Formaciones relativamente moces a les qu’hai qu’añader nomes consagraos de la escena d’esi país que tamién fixeron incursiones per estos caminos sonoros, ye’l casu del cantante Denez Prigent, con discos como’l tituláu Denez Teknoz Projekt-Trañs, grabáu en directo y onde’l ritmu márquenlu les programaciones, mentanto l’acordión y la guitarra arropen el so característicu y únicu timbre vocal.
Los irlandeses Jiggy son probablemente’l meyor exemplu actual d’esta tendencia, tienen publicaos namás dos discos (Translate -2017- y Hypernova -2020-) pero yá son toa una referencia. La so propuesta fusiona funk, hip hop, dance, beat-boxing… y la música tradicional irlandesa (instrumental y vocal) siempre presente, convirtiendo los sos conciertos nuna pista de baille multitudinaria. La crítica tien definío a la so música como «una esplosión cósmica d’enerxía».
Como yá viemos, Escocia foi pionera nesti tipu de músiques y sigue dando nomes relevantes nelles. Ye’l casu de Paul Mounsey, músicu, compositor, arreglista y productor discográficu que tien trabayao pal cine, la televisión y el teatru. Ta consideráu un alquimista sonoru pola versatilidá y variedá de la so música, que va de la esperimentación o los ritmos étnicos a lo industrial o progresivo. El componente escocés nunca falta nos sos trabayos, pero especialmente nos primeros, onde destaquen Tha Na Laithean A’Dol Seachad (centráu nel gaélicu propiu de les Tierres Altes y les Isles Hébrides escoceses) o Notes from the republic (d’esti álbum el propiu Mounsey comentaría: «Llegué a un alcuerdu colos mios raigaños»), llegaría tamién a publicar un discu a comuña cola banda de Celtic Rock más importante d’Escocia, Runrig, tituláu Proterra. Ensin dulda, ye’l compositor imprescindible p’adientrase nes músiques de vanguardia actuales d’Escocia.
Nel país vecín, Galicia, nomes como Baiuca son yá bien conocíos nestos ambientes musicales; ésti ye’l proyectu personal d’Alejandro Guillán, quien piensa qu’a la hora de falar de tradición hai dos conceptos qu’han tenese en cuenta: revisión y actualización. Él reinterpreta la tradición en clave d’otres músiques p’averala a públicos nuevos, nuna mezcla potente y elegante d’electrónica y soníos tradicionales qu’amiesta amañosamente; con un directu onde nun falten muñeires, xotes, alalás, foliaes, aturuxos, percusiones… y nun llugar preemiente voces femenines como l’elementu clave de la tresmisión oral de la cultura popular que son. Pero detrás de Baiuca hai más que música, hai una filosofía llingüística: «El gallegu ta vivu, ye esportable y pueden dase conciertos na nuestra llingua en toles partes del mundu», y un posicionamientu políticu: «Una parexa de baille gallega, tocando música gallega y la gaita colos colores de la bandera d’España creo que fai convertir esos elementos en dalgo que nun son. Nun pertenecen a naide más qu’al pueblu que les orixinó» (elDiario.es, 15 de mayu del 2021). Probablemente Baiuca ye’l más conocíu d’esta escena, pero non l’únicu, ehí tán tamién Os Gru (dúu qu’en 2014 publicaron un trabayu discográficu tituláu Ai Ruada a partir de les grabaciones feches pol etnomusicólogu estauxunidense Alan Lomax en 1952 en Galicia, filtraes con electrónica, hip hop y dub) o Boyanka Kostova (dúu de hip hop/trap que tamién tien esperimentao cola música tradicional gallega).
Na onda abierta por Afro Celt Sound System, qu’axunta a músicos escoceses/irlandeses con otros provenientes de llugares estremaos y na que l’elementu celta fúndese con otres músiques étniques, tán formaciones como Celtech (el so enfotu ye afalar a la xente a baillar a base de dub, electrónica, psicodelia y folk), The Sidh (ellos mesmos definen la so música como Electro/Celtic), Dance to Tipperary (Techno-Trance Celtic) o Shreem (Dj canadiense que fai Celtic Remixing).
Asturtrónica
Les rellaciones ente ritmos y programaciones electróniques na música asturiana danse bien ceo; en cierta manera podemos considerar un protoprecursor d’ello (con toles salvedaes que se quieran) al candasín Manolo Santarrúa, que nel añu 1980 publicaría un discu tituláu Amoríos onde los teclaos y los ritmos secuenciaos encárguense d’arropar la so voz, que transita ente’l Pop Llariegu, el Nuevu Canciu y la tonada. Un añu más tarde diba nacer una formación llamada Orquestina Son les Poles como un proyectu esclusivamente d’estudiu; nél taben dos de los productores asturianos más renomaos daquella: René de Coupaud y Pedro Bastarrica, que llegaríen a publicar dos discos onde arreglaben pieces mui conocíes del repertoriu tradicional asturianu sobre una base electrónica, munches d’elles diben convertise en sintoníes de programes radiofónicos o espacios televisivos fechos n’Asturies. Una formación importante d’esta escena foron Cuélebre, que se daríen a conocer masivamente con un tema de nome tan significativu como «Tecno Pericote», onde’l teclista Berto Turulla adapta esa danza popular llanisca en clave de tecno-disco.
Tamién formaciones d’otros estilos llegaríen a «coquetear» cola electrónica y los remix, ye’l casu de Balandrán (una pieza icónica d’ello ye la so «Gallegada de Tinéu»), Dixebra (ehí tán «La danza» y «Somos»), Corquiéu («Ónde vas por agua») o Herbamora («Nun voi sola»); muncho más fonda foi esta conexón en Xera, na qu’ún de los pegollos fundamentales de la so propuesta yera xustamente l’emplegu d’una base rítmica onde la electrónica xugaba un papel cimeru. En cuanto a nomes propios hai que falar de Da Robotz (Xel Díaz), pioneru na esperimentación electro con soníos y elementos trad y folk; Anabel Santiago, con un discu seminal como foi Son de la lluna onde la tonada concasa amañosamente con ambientes chill out, drum’n’bass y dance, arreglos que retomaría a lo llargo de la so carrera; y por supuestu Hevia (José Ángel y María José), que fixo d’ello la marca de la casa, especialmente en trabayos discográficos como Obsession (onde apaez un tema de nome «Keltronic»), que muestren el so llau más chill out, con un amiestu d’instrumentos acústicos y nueves tecnoloxíes. Anque de manera más collateral, Rodrigo Cuevas tien fecha dalguna esperiencia nesti sen, por exemplu la protagonizada xunto al productor catalán Raül Refree.
Si d’álbumes representativos se trata habría dos a tener en cuenta. Ún ye’l tituláu Asturllétric (2010), editáu pola Xunta pola Defensa de la Llingua Asturiana, onde s’atropen temes y remixes de grupos estremaos (fundamentalmente de folk y rock) con una óptica electro, el discu ufierta una visión afechisca y global de la folktrónica del país, demostrando que ta al altor de les propuestes que se faen a nivel européu. Pero’l trabayu esencial y cimeru diba publicase anteriormente, cuando nel 2007 el productor musical corverán Sergio Rodríguez presenta Tutu Studiu 07. Folk Electrónicu, onde baxo la so dirección collabora una bona representación d’intérpretes de la escena folki asturiana. Nél, los loops, secuenciadores, programaciones, samples, efectos… xunto a instrumentos eléctrico-acústicos y unes voces bien axeitaes (Xosé Ambás, Dolfu Fernández, Héctor Braga, Herbamora y Celestina Ca Sanchu) dan como resultáu una música d’espresión asturiana inxertada dafechu en parámetros contemporáneos. Ensin dulda, ye’l trabayu referencial d’esta escena a nivel asturianu.
Enllazando col empiezu del reportaxe, hai qu’acabar faciendo mención a les esperiencies nueves qu’afortunadamente tán produciendose anguaño. Y si daquién ta faciendo de punta de llanza, iguando un discursu coherente y argumentáu, esi ye’l xixonés Fruela 757 (Javier Suárez) que ta sabiendo, ensin prexuicios nin complexos, asimilar el legáu de l’asturianada clásica, la pop-music patria (Pop Llariegu) y la nuestra tradición musical (vocal y instrumental) pa fabricar una «nueva» música de raigañu asturiana qu’al empar suene popular y vanguardista. Otra propuesta perinteresante ye la de los castrillonenses Llevólu’l Sumiciu, dúu formáu polos hermanos Pablo y David Alonso, qu’entemecen lo audiovisual colo musical pa reinterpretar l’imaxinariu asturianu de manera esperimental, el resultáu ye una propuesta orixinal y escitante onde, por exemplu, los aires reguetoneros sirven de base a una pieza tan absolutamente trad como la «Saldiguera». La triloxía de nomes, a la espera de que se sumen otros más, a tener en cuenta nesta escena última de lo que llamamos ‘Asturtrónic’ sería L.lercia, que con temes como «Ximiélguense» o «Corri Corri», dambos d’aire ambient, tán dando forma a lo qu’ellos mesmos denomen Asturian future folk.
La tradición musical, a la contra del pensamientu más purista y inmovilista, ta ehí pal que la quiera facer suya. Les maneres d’entendela son munches y mui variaes y, lo que ye más importante, toes son válides. Aferranos a ella como daqué intocable nun val más que pa sapozala nel escaezu y a la postre na desapaición. Les xeneraciones más nueves de cada momentu históricu son llibres p’averala a los sos gustos y espresiones estétiques, demostrando que puede ser al empar antigua y moderna, local y global, rural y urbana.
SIENTI LA NUESTRA PLAYLIST DEDICADA A LA «CELTRÓNICA»
